Chelsea chuan an game hnuhnung berah Burnley chu Stamford Bridge-ah an lo inhnehtawkpuia, he inkhelah hian goal li lutin inkhel tan atanga minute 24 chhungin a lut nghal vek.

Burnley hian hun an khawhral lui nasa em em a, Chelsea lakah point hlawhchhuah hrim hrim an tum zia a lang. Chelsea defender David Luiz chuan Burnley khelh dan sawiselin, football khelh an duh loh thu a sawi.

Luiz chuan, “Hnehna chan tumin theihtawp kan chhuah a, mahse kan khelhpui te khan an chance neih chhun pahnihah goal an khunga, football khelh an duh bawk si loh avangin kan tan a harsa em em a ni. Khelmual chhunga thuneitu chu referee niin ka hria a, mahse khelmual chhunga thil thleng a vil hneh loh chuan thil a khirh thin.

“Burnley khan first half minute tir ber atangin hun khawhral luih an tum nghala, football khelh an duh loh avangin khelhpui an harsa hle a ni,” tiin Sky Sports a hrilh.

Chelsea assistant manager Gianfranco Zola pawhin Burnley khelh dan sawisel ve in, “Second half-ah khan football kan khel pawhin ka hre lova, hun an khawhral luih nasat em avangin minute nga chauh min pek belh kha a tawkin ka hrelo bawk.

“Kan lungawi hran lova, Burnley khelh tum dan kha hrethiam mahse kan lawm lo. Stoppage-time ah minute nga chiah min pek belh pawh kha a tawk lo hle bawk a ni,” tiin Sky Sports a hrilh ve bawk.