Kyle Walker chuan Manchester City chhuahsanin Burnley a zawm fel ta a, kum 2 chhung atan contract ziakin, Tottenham-a a lo khelhpui thin Scott Parker nen an thawk dun leh dawn ta a ni.

"Ka hlim hle, Scott nen kan inbiak a, season thar atana a hmachhawp te min hrilh, ka phur hle a, ka zawm ta a ni.

"Burnley ropui takin Scott hian a kaihruai a, point 100 lai hlawhchhuakin Premier League-ah an lo kir leh. Hma lam ka thlir a, khawvela league tha berah kei pawh ka kir leh dawn ta a ni.

"Season liamta khan Burnley an khel tha em em, an tlarhnung a phui em em bawk. Ka tawnhriat te team tana hmang turin ka inpeih a, squad tha tak ka zawm hi ka lawm a ni," tiin kum 35 mi Walker chuan a sawi.

Walker hi Sheffield United Youth Academy chhuak a ni a, Northampton Town, Aston Villa, QPR leh Tottenham-ah te a khelh hnuin, kum 2017 khan Manchester City a pan.

City-ah kum 8 hun a hmang a, game 317 a khel a, trophy 17 lai hlawhchhuakin, heng zingah hian Premier League title 6 leh Champions League title 1 a tel nghe nghe.

Season hmasa chawhnu lam kha loan-in Milan lamah hun a hmang a, Italian club tan game 16 a khel ve hman. Walker hi tun nipui bazara Burnley player lak luh 4-na a ni a, Axel Tuanzebe, Quilindschy Hartman leh Max Weiss te an lo la lut tawh a ni.