Inrinni zan khan 2022-23 Bundesliga season chu a hmawr bawk fel a ni a, Borussia Dortmund an chak zawh loh laiin Bayern Munich an chak avangin Bayern hi an champion a, Bundesliga-a a zawna vawi 11 an champion na a ni.
Kum 2011-12 season khan Dortmund hi Bundesliga-ah an champion a, hemi hnu hian Bayern bak champion an la awm leh lova, Bayern hi heti hian German top flight league-ah vawi 32 ngawt an champion tawh.
Bayern hian Koln an tlawh a, 2-1 in hnehna an chang. Bayern tan hian Kingsley Coman leh Jamal Musiala te chuan goal an thun a, Koln goal khat hi Dejan Ljubicic-a thun a ni.
Bayern hian point 71 neiin season an khar a, pahnihnaa awm Dortmund nen an point inang chiah mah se Bayern hi goal difference-a an chungnun zawk avangin an champion.
Bayern leh Koln inkhelah hian inkhelh tan atanga minute riatnaah Coman chuan Bayern hi hma a hruaipui. 1-0 in Bayern hian hma an hruai renga, 80mins an khelhin Koln in penalty hlawhchhuakin, Ljubicic chuan penalty spot atangin Koln si phurh a rul.
Bayern tan champion turin chak ngei ngei a ngai a, 1-1 a nih hnu hian Koln an nawr na zual hle. 89min-ah goal pawh an khung leh ta nge nge a, Musiala chuan box pawn atangin mawi takin bottom corner-ah ball a chhuih luta, Bayern hi an champion ta a ni.
Dortmund in Signal Iduna Park-ah Mainz an mikhual a, 2-2 in team hnihte an inhnehtawka, Dortmund in champion tura an point mamawh zat an hlawhchhuah loh phah.
Dortmund an khel tha lova, pressure an zo lo hle. Darkar chanve an khelh tlin hmain si hnih faiin Mainz in hma an hruaia, Andreas Hanche-Olsen leh Karim Onisiwo te chuan Mainz tan goal an khung.
Dortmund hian first half-ah penalty an hlawhchhuaka, goal khungna hun tha tak nei mah se, Sebastien Haller chuan a hlah a, Dortmund tan a uiawm hle. Bayern Munich an chak chuan Dortmund in an champion thei dawn lo tih an hria a, Mainz nawrin chance pawh an insiam tha thin viau.
69mins-ah Dortmund in goal an khunga, Portuguese player Raphael Guereiro chuan Dortmund goal hmasa zawk a thun. Injury time-a minute ruk an khelh Niklas Sule chuan Dortmund goal hnihna khungin, 2-2 a ni a, mahse Bayern Munich an chak avangin Dortmund hi an champion thei ta lo.
An game hnuhnung ber an khelh hma hian Dortmund hi Bundesliga table-ah pakhatna an ni a, Bayern nen point 2 in an inthlau. Dortmund hian point 71 hlawhchhuakin season an khar a, goal difference avangin an champion thei ta lo a ni.
RB Leipzig chu pathumnaah an awm a, anni hian season khar niah 4-2 in Schalke an hneh a, season thara Chelsea zawm tur Christopher Nkunku chuan goal hnih a thun a, heti hian goal 16 thunin French forward hi Bundesliga top scorer a ni.
