Coronavirus avangin season kal mek chu chhunzawm theih a ni rih lo zela, Germany lamah pawh an football league sang ber Bundesliga chu April ni 30 thleng an suspend leh rih.

Bundesliga bakah hian a hnuai chiaha awm Bundesliga 2 pawh suspend ve nghal a ni a, Bundesliga leh Bundesliga 2-a team awm 36 te chuan April ni 30 thlenga season kal lai suspend leh rih hi an remti tlang.

German Football League chuan season tan hma in player zawng zawng leh staff zawng zawngte hriselna enfiah turin mithiam a ruai dawn tih a sawi bawk.

German Football League chief executive Christian Seifert chuan June ni 30-ah season khelh zawh an tum thu sawiin, kumin chhung chuan entu mipui awm lova inkhelh a ngai tawh maithei tih a sawi bawk.

Seifert chuan, “Season kal lai hi June ni 30-a zawh hman kan tuma, mahse tum lawkna mai chauh a ni. Game khelh theih a nih chuan entu mipui awm lova khelh a ngai dawna, season lo awm tur pawh hi entu mipui awm lovin khelh a ngai maithei a, kumin chhung zawng hi entu an awm loh a ngai maithei,” a ti.