Weekend liamta Bundesliga inkhelah champion lai Bayern Munich an chak a, anmahni umtu ber Borussia Dortmund pawhin hnehna an chang bawk.
Bayern Munich hian Olympiastadion Berlin-ah Hertha Berlin an tlawh a, khual mualah Bayern hi 4-1 laiin an chak a, point thum nen an haw.
Bayern tan hian Corentin Tolisso, Thomas Muller, Leroy Sane leh Serge Gnabry te chuan goal khat theuh an khung a, Hertha lam goal neih chhun hi Jurgen Ekkelenkamp-a thun a ni.
Darkar chanve an khelh tlin hma deuhin Tolisso chuan Bayern goal hmasa ber a khung a, Muller chuan half time hma lawkin goal a khung a, 2-0 in firt half tihtawp a ni.
Minute sawmpanga vel khelh tur a la awmin Sane chuan Bayern goal thumna a khung a, minute li hnuah Gnabry chuan goal khung ve lehin 4-0 in Bayern hian hma an hruai a, Gnabry goal khung hnu lawk hian Ekkelenkamp chuan Hertha tan goal rawn khung ve in, 4-1 in inkhel a tawp.
Khelh 20-ah Bayern hian point 49 hlawhchhuak tawhin Bundesliga hmahruaitu an ni zel a, Hertha hian khelh 20-ah point 22 neiin, 13-na dinhmun an luah ve mek a ni.
Borussia Dortmund chuan Hoffenheim tlawhin, Rhein-Neckar Arena-ah an leng lut a, 3-2 in Dortmund hi an chak a, point thum hlu tak an hlawhchhuak.
Dortmund tan hian Norwegian goal thun khawl Erling Haaland chuan goal a khung bakah captain Marco Reus pawhin goal a khung a, Hoffenheim tan hian Andrej Kramaric leh Georginio Rutter-te chuan goal an khung ve bawk a ni.
Inkhel tan atanga minute rukna lekah Haaland chuan Dortmund hmahruaina goal a khung nghal a, half time hma chiahin Kramaric chuan Hoffenheim si phurh a rul a, 1-1 in first half a tawp.
Darkar khat an khelh hma deuhin Reus chuan Dortmund hma a hruaipui leh a, minute sawm a pawh a ral hmain David Raum-a own-goal hmangin Dortmund hian an goal thumna an khung a, 3-1 a ni. 77mins-ah Rutter chuan Hoffenheim tan goal khung ve lehin, 3-2 hian inkhel a tawp ta a ni.
Khelh 20-ah atangin Dortmund hian point 43 an hlawhchhuak tawh a, hmahruaitu Bayern chu point 6-in an pha lo. Hoffenheim hian khelh 20-ah point 31 neiin pasarihnaah an awm mek a ni.
Bayer Leverkusen chuan BayArena-ah Augsburg an lo mikhual a, 5-1 laiin Leverkusen hian an mikhual an lo sawp a, point thum an hlawhchhuak.
Leverkusen tan hian Moussa Diaby chuan hat-trick a siam a, Karim Bellarabi leh Lucas Alario te chuan Leverkusen tan hian goal khat ve ve an thun bawk. Augsburg goal neih chhun hi Arne Maier-a thun a ni ve thung a ni.
Leverkusen hian khelh 20-ah point 35 neiin pathumnaah an awm a, Augsburg hian khelh 20-ah ppint 19 chiah la neiin, 16-naah an awm mek a ni.
RB Leipzig chuan Red Bull Arena-ah Wolfsburg an lo mikhual a, Leipzig hi Willi Orban leh Jasko Gvardiol-te goal hmangin si hnih faiin an chak a, point thum pawimawh tak an hlawhchhuak.
Leipzig hian khelh 20-ah point 31 hlawhchhuak tawhin paruknaah an awm a, Wolfsburg hian khelh 20-ah point 21 neiin, 15-naah an awm ve thung a ni.
