Bundesliga inkhelah champion lai Bayern Munich chuan an tumpui an hneha, anni bakah hian anmahni umtu pahnih RB Leipzig leh Borussia Dortmund te pawh nuamsa takin an chak ve bawka, Bundesliga a ‘hot’ chho zel.

Khelh 22 khelh tawhah Bayern chu hmahruaitu an ni a, anni hian point 46 an hlawhchhuak tawh. Pahnihnaah RB Leipzig awmin, point 45 an hlawhchhuak tawha, pathumnaa awm Borussia Dortmund chuan point 42 an hlawhchhuak ve tawh bawka, palinaa awm Borussia Monchengladbach leh Dortmund-te point hi inang chiahin Monchengladbach hi khelh khatin an khel tlem zawk a ni.

Bayern Munich hian RheinEnergieStadion-a Koln an tlawha, Bayern hian mual neitu lam hi 4-1 in an hneha, ponint 3 pawimawh tak an hlawhchhuak.

Polish goal thun khawl Robert Lewandowski chuan inkhel tan atanga 3mins-ah Bayern hi hma a hruaipui nghala, 5mins-ah Kingsley Coman chuan Bayern goal hnihna khungin, 12mins-ah Serge Gnabry chuan Bayern goal thumna a khung leh nghala, minute 12 chhungin Bayern hian goal thum an khung.

Arsenal player hlui Gnabry hian second half-ah goal a khung leha, Mark Uth chuan Koln tan hian second half lamah goal khat a khung ve bawk.

Koln 1-4 Bayern Munich

(Uth 70’) (Lewandowski 3’, Coman 5’, Gnabry 12’, 66’)

RB Leipzig chuan Red Bull Arena-ah Werder Bremen an lo mikhuala, Leipzig hian an mikhual hi 3-0 in an lo hneh.

He inkhelah hian Lukas Klostermann, Patrick Schick leh Nordi Mukiele-te chuan Leipzig tan goal khat theuh an khunga, an team chu point 3 hlu tak an hlawhchhhuahpui.

RB Leipzig 3-0 Werder Bremen

(Klostermann 17’, Schick 39’, Mukiele 46’)

Borussia Dortmund chuan Westfalenstadion-ah Eintracht Frankfurt an lo mikhuala, Dortmund hian an mikhual hi dim lo hle in, si li faiin an lo hneh.

He inkhelah hian Dortmund tan Lukasz Piszczek, Jadon Sancho, Erling Haaland leh Raphael Guerreiro-te chuan goal khat theuh an khung.

Borussia Dortmund 4-0 Eintracht Frankfurt

(Piszczek 33’, Sancho 49’, Haaland 54’, Guerreiro 74’)