Pierre-Emerick Aubameyang chuan North London Derby-ah goal hnih thunin Arsenal chu a chakpui a, heti chung hian a nih tur ang a la nih phak loh thu sawiin, tun hi chu bul tanna chauh a la nih thu a sawi.

Gabon striker hian first half-ah penalty atanga goal thunin Arsenal chu 1-0 in hma a hruaipui a. Tottenham tan Eric Dier leh Harry Kane te chuan goal khat ve ve an thun a, mahse second half ah Aubameyang bawk hian goal dang a thun leh a, 2-2 a nih phah a. Alexandre Lacazette leh Lucas Torreira te chuan goal khat ve ve thun belhin Arsenal chu 4-2 in an chak a ni.

Kumin January thla khan Aubameyang hian Bundesliga club Borussia Dortmund atangin Arsenal hi a zawm a, tun season hi season tir atanga a khelh tanna chiah a ni.

“Game khata goal hnih thun theih kha chu tha ve deuh chu a ni tiraw? Tunah hi chuan 100% hi ka la ni loin ka hria a, mahse ka ni thei vat dawn tih ka chiang a. Khelmuala ka awm danah hian ka inhre thei mai a, 100% hi chu ka hlat vak tawh lo a, ka hlim phah khawp mai,” tiin Auba chuan a sawi.

A sawi zelnaah, “Team te hian min pui nasa hle a, tha taka khel thei turin min dawm kang thiam em em a, kan boruak a fuh chho tial tial a. Match khel turin rim takin kan thawk a, mahse helai hmunah hian ka hlim tak zet a, engkim hi a fuh riau,” a ti bawk.

Aubameyang hian tun season chhungin Premier League game 14 khelhah goal 10 a thun tling tawh a, Fulham leh Leicester City te lakah goal hnih ve ve a lo thun tawh bawk a. Tun season chhungin Premier League goal 10 thun tling hmasa ber niin, top scorer a ni mek bawk a ni.

A pumpuiah Aubameyang hian Arsenal tan game 32 a khel tawh a, hengah hian goal 22 chu a thun tling tawh a ni.