Miami Heat chuan Milwaukee Bucks an hneh a, 2014 hnua a vawi khatna atan Eastern Conference final an lut.
Eastern Conference semi final series an khelhah Miami Heat tan player paruk ngawtin double figure an thun a, Milwaukee Bucks chu 103-94 in an hneh a, 4-1 in an series khelhah an chak a ni.
Kum ruk kal ta atang khan Eastern Conference final hi Heat hian an lut leh thei tawh miah lo a, tun tum hi LeBron James leh Dwayne Wade te tel loa final an luh leh theih hmasak ber a ni.
Heat hian final-ah chuan semi final pakhata Toronto Raptors leh Boston Celtics te inkhela chak zawk zawk an hmachhawn dawn a. Eastern Conference semi final series an khelh tawh chinah Celtics chuan 3-2 in hma an hruai mek a, vawi khat an chak leh chuan final an lut thei ang.
LeBron James chuan hmun dangah point 36 a thun a, Los Angeles Lakers a chakpui a, Houston Rockets nen series an khelh mekah 2-1 in hma an hruai theih phah a ni.
Western Conference semi final best-of-seven series khelh mekah Los Angeles Lakers chuan 112-102 in Houston Rockets an hneh a, 2-1 hian hma an hruai zui a. LeBron James chuan NBA record thar a siam a, playoff bikah vawi 162 a chak chiah a, chak hnem ber a ni thei ta a ni.
James chuan playoff bika vawi 162 chak tur hian team hrang hrangah a khel kual a, Cleveland Cavaliers, Miami Heat leh Los Angeles Lakers ah te a khelh kual hnuah hetiang dinhmunah hian a ding thei a ni.
“Hetiang dinhmuna ka din theih chhan chu team ropui tak taka ka khelh vang a ni tih a chiang a. Teammate tha deuh deuh leh coach tha tak tak te zar ka zo a ni,” tiin LeBron James chuan a sawi.
Manchester United manager Ole Gunnar Solskjaer chuan an midfielder Paul Pogba inkhelh theih hun tur a sawi a, Pogba hi la chawl rih dawnin kumin December thla hma chu khelmual chhungah kan hmuh hmel rih lo.
Pogba hian September ni 30-a Arsenal a hmachhawn bak a la inkhel leh lova, tun season-ah United tan hian vawi ruk bak a la inlan lova, a hliam hian dam lam a la pan lutuk lo niin a lang bawk.
Solskjaer chuan Pogba hian dam fel nan hun a la mamawh thu a sawia, November thla ni 24 Sheffield United an hmachhawn hunah Pogba hi a inlan thei tawh maithei tih a sawi rualin, December thla hmaa kan hmuh leh a rin vak loh thu a sawi bawk.
Solskjaer chuan Pogba lo kir hun tur zawhna chhangin, “December thla hma chuan kan hmuh ka beisei lutuk lova, a la chawlh rih a ngai dawn. Dam fel vek nan hun a la mamawh a, international break awm leh tur zawh hnua Sheffield United kan hmachhawn hun hian a lo kir thei tawh maithei.
"December hma chuan kan hmuh a rinawm loh viaua, a nat dan chiah hi daktawr ka nih loh avangin ka hrechiang bik lova, mahse a ngal rekah chuan hliam a nei ngei a ni,” a ti.
Pogba hi United player tha ber a tih theiha, a khelh that phawt chuan midfield khaikhawm tu ber a ni a, tun hnaiah United an che tha lo mek bawk nen United hian Pogba hi an mamawh hle a tih theih awm e.