Chelsea chuan Ningani zanlai khan Premier League inkhelah Norwich City an tlawh a, Chelsea hi 3-1 a chakin point thum pawimawh tak nen an haw.
Chelsea tan hian Trevoh Chalobah, Mason Mount leh Kai Havertz te chuan goal an khung a, Norwich goal neihchun hi Teemu Pukki-a thun a ni.
Khelh 27 atangin Chelsea hian point 56 an hlawhchhuak tawh a, pathumnaah an awm chhunzawm zel a, Norwich hian khelh 28 atangin point 17 chiah an la nei a, Premier League table mawngphahah an awm ve thung a ni.
Norwich an hmachhawn hma hian UK sawrkar chuan Chelsea neitu pa Roman Abramovich-a thil neih te an hren sak thu an puang a, Chelsea an buai zui nghal. Chelsea sponsor tu ber Three pawhin Chelsea nena an inzawmna an tihtawp rih thu an puang zui ve nghal a, Chelsea kawr hmaah Three logo a chuang tawh dawn rih lo. Chelsea kawr ban sponsor tu Hyundai pawhin ngaihtuahna an sen mek thu an tarlang bawk. Hetiang tak hian Chelsea hi Norwich nen an inkhelh hma lawkin buai mah se khelmual chhungah an inlungrualzia ti langin hnehna pawimawh tak an chang a ni.
Chelsea an khel tha a, inkhelh an tan atangin inkhel an thunun nghal. Goal pawh a lut har lova, minute hnih chuang awrh an khelhin Chelsea hian goal an khung a, corner atanga Mount-a ball vawrh luh chu Chalobah chuan goal-ah lo tauh lutin Chelsea hma a hruaipui. Chelsea hian chance tha tak an nei zui leh nghal a, Havertz-a shot tha tak chu Norwich goalkeeper Tim Krul-a’n a lo save.
Hma an hruai atanga minute sawm hnu velah Chelsea-in goal an thun belh a, Havertz chuan box chhung veilam atangin Mount ball a pe a, English midfielder hian chiang zetin top corner-ah a pet lut a, 2-0 in Chelsea hma a hruaipui.
Darkar khat chuang an khelhin Chalobah chuan ball a block naah a ban a hmang a, hun eng emaw chen VAR-a check a nih hnuah Norwich hian penalty an hlawhchhuak. Pukki chuan penalty hi goal-ah chantirin 2-1 a ni. 90mins-ah chiah Chelsea goal thumna a lut a, N’Golo Kante chuan box chhung dinglam atangin Havertz a pe thla a, Havertz hian mawi takin top left-corner ah a pet lut a, 3-1 in Chelsea hi an chak ta a ni.
Norwich City 1-3 Chelsea
(Pukki 69') (Chalobah 3', Mount 14', Havertz 90')
Player Ratings
