BSNL in ambassador atan Mary Kom an hmang

05th September 2018, 11:09PM

BSNL chuan Indian boxer MC Mary Kom chu kum hnih chhung atan an company ambassador atan an ruat.

Telecom secretary Aruna Sundararajan chuan, “Mary Kom hian BSNL brand ambassador ni tura kan sawmna chu a pawm thei hlauh mai a, hetianga kan inkawp chhoh avang hian kan tangkaipui dawn hle a. Mi tam zawkin BSNL hi an rawn ngaihven belh theih phah dawn a, tun aia nasa zawkin tan kan la ang a, kan elpuite aia dinhmun sangah kan awm zel theih kan beisei tlat a ni,” a ti.

Hetianga an inzawm takah chuan Bharat Sanchar Nigam Limited leh Mary Kom te hian TV ah fakna te an tihchhuah dawn bakah, chanchinbu lamah pawh fakna hi an ti thin ang a, an tariff plan te pawh an thlak danglam nual dawn bawk a ni.

Anupam Shrivastava, BSNL chairman leh managing director ni bawk chuan, “BSNL chakna leh Mary Kom te hian inanna deuh mai an nei a. Kum hnih chhung kan inzawm thei tur hi lawmawm kan ti em em mai a, hemi chhung hian kan company tihlar zel nan Rs. 30 lakh chu kan hmang dawn a ni,” a ti.

Mary Kom hi a inhliam avangin Asian Games 2018 ah khan a tel thei ta lo a, a dam hunah chuan chak chho zel turin tournament ah tel zel a tum thu a sawi.

“Ka sawi ziah thin chu tlawm mai loh tur tih leh duhtawk mai loh tur tih hi a ni a. Engtik lai pawhin din chhuah a chak zel hi tum tur a ni. BSNL pawh hi thahrui ngah tak mai an ni a, kan pahnih hian kan champion chho zel dawn a ni,” tiin a sawi.

Vawi 5 ngawt world champion lo ni tawh Mary Kom chuan kumin November thlaa world championship lo awm turah tel ngei a duh thu sawiin, India rama nghah tur a nih bawk avangin tel theih ngei a tum hle a ni.

Copyright © inkhel.com 2024. All rights reserved.