March ni 22, 2016 khan Brussels-ah bomb vawi hnih a puak a, mi 34 laiin nunna an chan bakah mi 200 chuangin hliam an tuar. Hliam tuar zingah hian Belgian basketball player Sebastien Bellin tel velin, nimin khan zai a ni nghe nghe.
Kum 37 mi 6'7ft-a sang Sebastien Bellin hi Brazil-a piang niin, Belgian professional basketball team Gent Hawks tana khel mek a ni a. Zaventem airport-a thihchilh bomb puak khan metre 20 laia thui a vawrh a, a keah hliam tuarin nimin khan zai a ni.
FIBA (European basketball’s governing body) chuan Belgian national team player hi a that chhuah leh vat theih nan duhsakna an hlan a, a khelhna club leh a club hlui leh sports lama pawl hrang hrangten duhsakna an hlan hlawm bawk a ni.
Nikuma misual ten Paris an beih tuma ngaihtuahna sengtu ber Salah Abdeslam chu kar hmasa zirtawpni khan Belgium-ah man a ni a. Hemi hnu lawk hian thihchilh bomb vawi hnih lai Brussels-ah a puak chhunzawm nghal a.
07.00 GMT-ah Zaventem airport beih a ni a, mi 14 an thi a, hemi hnu darkar khat velah Maelbeek metro station beih a ni leh a, hetah hian mi 20 an thi a ni. He pawikhawihna hi ISIS chuan an tihah an chhal a ni.
Pictures credit : Getty/AP