Bryan Robson chuan midfielder Bruno Fernandes chu Manchester United legend Paul Scholes nen inang a tih thu a sawi.

Manchester United captain hlui Bryan Robson chuan Portuguese midfielder Bruno Fernandes chu a fak hle a. Kumin January thlaah Fernandes hian Sporting CP atangin Old Trafford a pan a, thawm a nei lian nghal hle a. Coronavirus vanga inkhel an chawlhsan hmain inelna hrang hrangah goal thum chu a thun hman a ni.

Goal a thun mai bakah mi goal thun tur vawi thum a siamsak bawk avangin February thlaah khan Fernandes hi Premier League Player of the Month atan an thlang a, March thla atan Manchester United Player of the Month atan an thlang zui leh bawk a ni.

Robson chuan Old Trafford-a bul tan tha tak, kum 25-a upa Portugal midfielder chu fakin, “Manchester United a zawm atang khan Fernandes hi player tha tak, danglam tak a ni tih a hriat theih nghal mai a, a rilru put hmang hi a tha hlein ka hria,” a ti.

“Vawi eng emaw zat chu kan intawng ve tawh a, training neihnaah te pawh ka hmu ve tawh a, a teammate te nen pawh an inpawh tlang hle a. Amah han hriat chian chhoh hnuah chuan Sporting Lisbon captain a nih theih chhan te pawh a hriatthiam theih nghal mai a, inkhelh a thiam em em a ni,” a ti bawk.

A sawi zelnaah, “Roy Keane te, Paul Ince te leh Nicky Butt te ang hi a ni ve lo a, kei chuan Paul Scholes nen inang ka ti khawp mai a. Defence leh midfield inkar awl vela luh dan a thiam em em mai a, hetiang hmun awl hi a hmu thei a, a lo awm zung zung a, hmun a inpe thiam riau zel a ni,” a ti.

“A khaw hawi a zau a, a thiante ball pek tur leh pek dan tur a hmu zung zung a, a ngaihtuah chhuak zung zung bawk a, Paul Scholes ang chiahin tha takin ball a pass thin a, goal a la thun thei zui,” a ti a ni.

“Amah ka hmuh dan hi a takah thlentir thei hram turin ka beisei a, Manchester United tan Paul Scholes thar ni leh thei ngei se tih hi ka duhthusam a ni,” tiin Bryan Robson chuan a sawi.