17 Nov 2020 07:18

inkhel

Bruno Fernandes chet tawh dan tlangpui

Bruno Fernandes chuan thawm a nei lian thei viau mai a, tun hnua Manchester United in player an lak fuh ber pawl a tih theih awm e.

Kumin February thla atangin Manchester United tan a inkhel tan a, Portuguese midfielder hian khelmualah player rintlak a nihzia a lantir nasa tawh hle a. Season hman zawh takah khan Manchester United chu Premier League-ah pathumna a nihpui thei a, 2020-21 season ah pawh amah hi chuan bul a tan chhe hran lo hle.

Manchester United a zawm hnuah leaue game 21 a khel tawh a, hengah hian Bruno Fernandes chu goal 23 ah a inhnamhnawih tawh a. Amah hian goal 13 a thun tawh a, mi goal thun tur vawi 10 chu a siamsak tawh bawk.

2019-20 season ah khan Fernandes hian league goal 8 a thun a, mi goal thun tur vawi 7 chu a siamsak hman a. Tun season kal mekah hian goal 5 a thun tawh a, mi goal thun tur hi vawi 3 chu a siamsak tawh a ni.

Premier League goal 13 a thun zinga 12 chu a ke ding lama a thun niin, heng zingah hian penalty hmanga a thun goal 6 a tel a. Kar hmasaah khan Everton nen an inkhelhin a lu hmangin goal a thun a, a lu hmanga goal a thun hmasak ber a ni.

Fernandes hian goal shot 64 a nei tawh a, heng zinga vawi 28 hi goal zawnah a pet fuh a. A thiante ball pek chungchangah a tha thawkhat hle a, goal thunna hun tha em em vawi 6 a siam tawh a, through ball tha deuh vawi 10 chu a pe hlawhtling tawh bawk a ni.

Inelna hrang hrangah Fernandes hian Manchester United tan game 33 a khel tawh a, hengah hian goal 18 chu a thun tling tawh a. Season hman zawh takah khan inelna hrang hrangah game 22 chu a khel hman a, goal 12 chu a thun bawk a. Tun season kal mekah game 11 khel tawhin, hengah hian goal 6 chu a thun tawh a ni.

UEFA Champions League lamah Bruno Fernandes hian goal 1 chu a thun tawh a, Europa League lamah goal 3 a thun tawh bawk a. Inelna hrang hrangah mi goal thun tur vawi 13 chu a siamsak tling tawh a ni.