Manchester United chuan Sporting Lisbon atangin Portuguese midfielder Bruno Fernandes chu an la dawn ta nge nge niin a langa, Fernandes-a man tur hi pound maktaduai 60 vel a ni dawn niin chanchinbu mite chuan an tarlang.

Sporting hian zanin zanlai (naktuk zingkar) dar 2:45-ah Benfica an lo mikhual dawna, hei hi Sporting tana Fernandes-a game hnuhnung ber tur nia sawi niin, hemi game zawhah hian kum 25 mi hi Manchester lamah Manchester United-a medical nei turin a thlawk lut zui nghal dawn niin sawi a ni.

Sky Sports tarlan danin United hian Fernandes-a manah hian pound maktaduai 43 an pe phawt dawn a, add-ons neuh neuhah United hian pound maktaduai 17 vel an la chawi belh thei dawn niin Sky Sports hian a tarlang bawk.

Fernandes hian United chu mimal thilah inremna a neih pui tawh nia sawi niin, kar khatah pound 120,000 vel a hlawh dawn nia sawi a ni.

United hian Fernandes hi Benfica lakah khel tawh lo turin duh mahse Benfica lam hian an supporter-te mangtha na hun mumal an pe duh niin Sky Sports chuan a tarlanga, hemi a nih avang hian Fernandes hi Benfica lakah rei tak a khelh a rinawm loh.

United hian Fernandes hi an lei zui mai a rinawma, Sunday-a United-in Anfield-a Liverpool an tlawh hunah pawh Fernandes hi Anfield-ah kan hmuh a beiseiawma, Thawhtanni lam chuan United hian official-in Portuguese player hi an lakluh fel tawh ngei a rinawm a ni.