Conor McGregor chuan coronavirus vanga inkhung a ngaih tawh loh hnuah chuan Bruce Lee ang vel a rawn nih tur thu a sawi.
UFC star Conor McGregor chuan 2013 kuma a inkhung hran kha a thatpui hle a ni tih sawiin, khatih lai vela a tweet chu a pho lang thar leh a. Tuna coronavirus vanga inkhung ngai chu tangkai zawnga hman a tum thu sawiin, inkhung a ngaih tawh loh hunah chuan fighter tha lehzual a nih tawh tur thu a sawi a ni.
Kum 31-a upa Conor chuan martial arts legend Bruce Lee nen a intehkhin a, hei bakah hian Bruce Lee thlalak a tar chhuak a, he thlalakah hian photoshop hmangin a tattoo chhut ang kha an bel ve nghe nghe a ni.
Tun kar tir lamah khan UFC world champion lo ni tawh McGregor hian thil chu a tha zawngin a inher chhuak zel dawn tih a lo sawi tawh a. Tun atanga hun rei vak loah Octagon chhungah hmuh theihin a awm leh tawh dawn niin a lo sawi a ni.
Kumin January thlaah khan kum khat chuang a chawlh tawh hnuah McGregor chu Octagon chhungah a inlan leh a, UFC 246 ah khan Donald Cerrone chu hmachhawnin, second 40 chhung lekin a khingpui hi a hneh nghal der a ni.
Donald Cerrone a hneh hnuah hian a fight neih leh tur chu engtikah nge thleng dawn tih te engmah puan zui a awm rih lo a. Conor hian a duhthusam a sawinaah kum khat chhungin fight vawi thum tal neih theih a duh a, vawi khat chu fight a nei tawh a, a lehpek neih hun tur leh a hmaa ding tur hi a la hriat theih loh a ni.
“Entute chuan fight hmuhnawm tak en an duh thin a, chutiang chu an beisei ber pawh a ni a. Boruak sosang tak hnuaia insual en tluka duh an nei lo. An duh ang tihpuitlin theih ngei hi ka duhthusam a ni thin a, chu bakah an tan hian chak theih ngei hi ka tum tlat thin,” tiin Conor chuan a sawi.
“Tu pawh insualpui ka huam a, boruak sosang tak hnuaia insual ka duh avangin chutiang a nih dawn loh chuan engah mah ka ngai lo a. Pawisa hi ka insual chhan a ni lo. Pa hausa deuh mai ka ni a, pawisa chu ka buaipui hran lo hle,” a ti bawk.
A sawi zelnaah, “Insual hi num ka ti a, thil tam tak pawh ka zir chhuah phah tawh nghe nghe a, tun thlengin nuam ka la ti reng a. Octagon chhungah pawh hun rei vak loah chuan min hmu leh thei tawh ang a. Min hmuh leh hunah chuan ennawm hmuhnawm tak in en ngei ang tih ka ring,” a ti.