Bronze Medal la F.Lalmalsawmi MSSC-in lawmpui

19th May 2015, 02:05PM

Jarkhand khawpui Ranchi-ah April 23-26, 2015 chhung khan India ram pum huap Wrestlling Championship neih a ni a, Mizoram aiawha kal zingah F.Lalmalsawmi chuan Bronze medal a dawng. Nimin chawhma dar 11:00 khan Mizoram State Sports Council chuan an Office, Infiammite Zawlbukah Malsawma medal lak lawmpuina hun a hmang.

34th Boys Free Style/Greco Roman Style & Female Junior National Wrestling Championship 2015 hi thla hlui khan Ranchi-ah neih a ni a, Mizoram atangin intihsiakna hrang pahnihah team official leh players an vaiin mi 25 an fehchhuak a, Malsawmi'n Kg.75 hnuailam huangah bronze medal a dawng a ni.

Medal lawmna huna thusawitu Lalrinfela, Joint Secretary MSSC chuan, " Wrestling hi khawvel huapah pawh India lan phakna game a ni a, Mizote pawhin traditional game-ah kan hmang bawk. Infiamna ngaihhlut hlawh a ni a, tihtakzeta luhchilh tlak a ni" a ti. MSSC Joint Secretary chuan, " Sum leh pai harsatna avangin infiamna discipline hrang hrang hma hun hriat a har tawh a, sawrkar tanpuina ringawta innghat lovin mahni ke a din theih kan tum a ngai a, chutiang tur chuan kan inbuatsaih pawh a ngai tawh a ni" tiin bronze medal latu Malsawmi hlawhtlina a lawmpui thu leh khawvel huap inelnaah Mizoram leh India ram tihmingthatu la ni ngei turin duhsakna a hlan.

Malsawmi medal lawmpuina hun hi James Lalramnghaka, AE, MSSC chuan a kaihruai a, MSSC chuan a tih thin danin lawmpuina thilpek a hlan a, Mizoram coach Suraj Parkash (SAI Coach) hnenah lawmpuina a hlan bawk.

F.Lalmalsawmi hian kum 2012 atang khan Wrestling a luhchilh tan a, tunah hian Bawngkawn, Aizawlah cheng mekin Mizoram Wrestling Association chuan hmeichhe wrestler an neih zinga hma hun eng ber pakhat a nih thu an sawi.

Copyright © inkhel.com 2024. All rights reserved.