Jorge Lorenzo chu a chetsual hnuah MotoGP intlansiakah vawi hnih chu a inlan thei dawn lo a, August thlaa British Grand Prix intlansiakah a tel ve thei dawn chauh niin an sawi.

Vawi thum ngawt MotoGP world champion lo ni tawh Jorge Lorenzo hi June 28 khan Dutch Grand Prix atana an inpuahchahnaah a chesual a. A bike chu a tlu a, race track atangin pawn lamah a tleng chhuak a ni.

A chetsual hian amah chu boruakah vawi li ngawt mai a invawrh vir hman a, hemi hnuah hian intlansiakna track pawna lei phihrit an dahah chuan a va insawh zui a. Hetia a chetsual vang hian a spinal vertebrae pahnih (T6 leh T8) chu a tikhawlo a ni.

Uluk takin a hliam hi an enkawl chho a, hma a sawn chak bawk a, August 25 a British Grand Prix-ah chuan Lorenzo hi intlansiak ve thei tawh turah an ngai a ni.

Honda chuan thuchhuah an siam a, “Jorge Lorenzo leh Repsol Honda Team te chuan a chetsual hnuah Lorenzo chu Czech Grand Prix leh Austrian Grand Prix-ah te tel lo se tha kan ti a. A hliam chu chak zawka a dam theih nan heng intlansiak pahnih atang hian inthiarfihlim a fuh zawkin kan hria a ni,” an ti.

“Lorenzo dinhmun hi tunah chuan a ziaawm leh tawh a, hma pawh a sawn chak hle a. A hliam laiah hian na a la awm ve reng a, bike khalh lai pawhin duhthusamin a la che thei lo a. Indim taka awm a la ngai reng tho a ni,” an ti bawk.

August 4 hian Czech Grand Prix a awm dawn a, hetah hian Lorenzo ai chu German rider Stefan Brandl chuan a awh dawn a, August 11 a Austrian Grand Prix a awm hunah pawh Stefan Brandl tho hi a tlan dawn a ni.

Kum 32-a upa Lorenzo hian 2010, 2012 leh 2015 h te khan world title a la a, tun season kal mekah erawh a che fuh hleithei lo hle a. Season tan tirh atang khan chetsual a nei leh thin a, hei vang hian beisei angin a thleng sang thei lo hle.

Season kal mekah Spanish rider Jorge Lorenzo hi MotoGP rider ranking-ah 16-na a ni thei chauh a. A teammate Marc Marquez chuan point 185 hmuin rider stadings-ah hmahruaitu a ni mek a ni.