Pathianniah hian MotoGP British Grand Prix an tlan dawn a, Inrinnia qualifying an tlanah Marc Marquez chu a che tha ber a, Valentino Rossi pawh pahnihnaah a ding thei dawn a ni.

Repsol Honda rider Marc Marquez chuan a zawnin vawi li chu pole position a chang ta a, 2019 chhunga intlansiak vawi 12-ah vawi 8 chu pole position hi a chang thei bawk a, a vanglaia pole position a chan vawi 60-na chiah a ni bawk.

Silverstone Circuit-ah hian Valentino Rossi chu pole position chang thei tura ngaih a ni hman tawh a, mahse a tawp dawnah Marquez chuan second 0.428 chauhin a khum a, Monster Energy Yamaha rider Rossi chu pahnihnaah a ding dawn ta a ni.

Pramac Racing rider Jack Miller chuan contract a ziah thar lawmna atan Pathiannia intlansiak hunah pathumna atangin bul a tan thei dawn a. A hnung chiahah hian Petronas Yamaha rider Fabio Quartararo a ding dawn bawk a ni.

Marquez-a elpui ber tia sawi theih, Ducati rider Andrea Dovizioso chu pasarihnaah a ding dawn a. A hmaah hian Suzuki Ecstar rider Alex Rins leh Monster Energy Yamaha rider Maverick Vinales te chu an awm ang.

Petronas Yamaha rider Franco Morbidelli chu pariatnaah a awm ang a, a hnung chiahah hian LCR Honda rider Cal Crutchlow chu a awm dawn a. LCR Honda rider dang pakhat Takaaki Nakagami chu sawmnaah a awm ang a, a hnung chiahah hian riders’ championship-a pathumna, Ducati rider Danilo Petrucci chu a ding dawn a ni.

British Grand Prix qualifying result

1. Marc Marquez (Repsol Honda): 1:58.168
2. Valentino Rossi (Monster Energy Yamaha): +0.428s
3. Jack Miller (Pramac Racing): +0.434s
4. Fabio Quartararo (Petronas Yamaha): +0.444s
5. Alex Rins (Suzuki Ecstar): +0.502s
6. Maverick Vinales (Monster Energy Yamaha): +0.594s
7. Andrea Dovizioso (Ducati): +0.594s
8. Franco Morbidelli (Petronas Yamaha): +0.928s
9. Cal Crutchlow (LCR Honda): +1.075s
10. Takaaki Nakagami (LCR Honda): +1.259s
11. Danilo Petrucci (Ducati): +1.319s
12. Aleix Espargaro (Aprilia Racing): +1.452s