Adam Lallana chuan Liverpool-a a contract hmang zovin, free transfer-in Premier League club dang Brighton a zawm fel.

Kum 32 mi Lallana hian Brighton-ah hian kum 3 daih contract a ziaka, kum 6 chhung hun a lo hman tawhna Anfield chhuahsanin, Falmer Stadium-ah a inpu lut.

Lallana hi Premier League club dang te pawhin sawm mahse Brighton hian an changa, Thawhtanni khan medical nei felin, a lut chhunzawm nghal a ni.

Brighton manager Graham Potter chuan Lallana an lakluh chungchang sawiin, “Adam-a that zia hi kan hre veka, a inkhel kan en let chuan a theihna hi mi tin tana hmuh theihin a awm. Ram leh club tan level sang ber berah football a lo khel tawha, thil tam tak a hlawhchhuak tawh bawk.

“A that mai bakah hian tawnhriat a nei ngah tela, Liverpool-ah a hlawhtling em em a, Anfield lamin an ngaihhlut dan atang ringawt pawh hian a that zia a lang nghal. Adam kan lalut thei hi kan tan a phurawm hle a, kan supporter-te pawhin a khel an en chak tawh hle in ka ring a ni,” a ti.