Nilaini zan lai khan Premier League inkhelah, champion fel tawh Manchester City chuan Brighton an tlawh a, si khat ve ve inpe in team hnihte hi an inhnehtawk.

Falmer Stadium-ah hian mual neitu lam tan Julio Enciso chuan goal a khunga, mikhual lam City tan hian English midfielder Phil Foden chuan goal a khung ve bawk.

City hian khelh 37 atangin point 89 an hlawhchhuak tawh a, sawi lan tawh angin an champion fel tawh a, pahnihnaa awm Arsenal nen khelh zat inangah point 8 in an inthlau. Brighton hian khelh 37 atangin point 62 an nei a, paruknaah awmin, an dinhmun a danglam thei tawh lo a ni.

City manager Pep Guardiola chuan, Sunday liamtaa Chelsea an hneh tum ang em emin a player tha te a hahchawlh tir tam tawh lova, mahse an first choice goalkeeper Ederson erawh a inlan lova, a aiah Stefan Ortega chuan si ban a nghak leh.

Brighton an khel chhe lo hle a, inkhel tan tir lamah chance nei tha zawk pawh an ni. Minute sawmhnih an khelh Brighton hian free kick an hlawhchhuak a, Danny Welbeck chuan free kick atang hian goal-ah ball petin, a goal teuh hle a, goal kham a pet per.

Welbeck-a’n cross bar a pet per hnu lawkah City in hma an hruai a, Erling Haaland chuan Brighton goalkeeper Steele-a lamah ball a khalha, Foden pe letin, Foden hian goal-ah a lo chantir a, si khat faiin City in hma an hruai.

First half-a minute nga chuang hret khelh tur a la awmin, Brighton in si phurh an rul a, yard 25-a hla atangin Enciso chuan mawi em em in top corner-ah ball a pet lut.

Hun tawp hnaih lamah Haaland chuan Cole Palmer-a cross chu goal-ah lo khungin, City in hma an hruai emaw ti zet mah se, VAR-a uluk zawka en a nih hnuah Colwill laka foul avangin goal hi pawm a ni lova, 1-1 in inkhelh tihtawp niin, team hnih ten point 1 ve ve an hlawhchhuak ta a ni.