Old Trafford-ah Brighton chuan 3-1 laiin Manchester United an hneh. Tun season Premier League game 5 atangin United hi vawi 3 an tlawm ta chu a ni a. Inkhelh zawhah Erik ten Hag a lungawi lo hle.

"An goal hnih rawn khungna pawh kha an chance neih vawi hnihna chiah a ni maithei. Kan team hi kan intuaithar a ngai.

"Kan game plan anga kan khelh a pawimawh ber, khelh dan tur kan ruahman ang kha kan rintawk a ngai. 

"Hma kan sawn a ngai hle mai, mimal pawh tha zawka kan khelh a ngai. Hun harsa te pawh kan tawng thin, chung hun harsa kan tawh chu theihtawpa hmachhawn zel tur kan ni.

"Tun dinhmunah erawh harsatna kan inhnehtir a, chak duhna thinlung kan pu lo niin a lang, kan tlarhnung pawh a phui tawk lo bawk.

"Arseal leh Spurs kan hmachhawn te kha chuan kan theihtawp kan chhuah alawm. Khang game-ah khan chak thei dinhmunah kan ding bawk. 

"Kan that tawk lohnaah te kan insiamthat nghal mawlh mawlh a ngai, midang kan dem thei lo, a aia tha zawka kan khelh a ngai a ni mai," tiin Erik ten Hag chuan Brighton an hneh loh hnuin a sawi.

Champions League khelh tan a ni dawn, Manchester United chuan tun kar hian Bayern Munich an hmachhawn dawn. 

"Kan che tha lo a, tha zawka che tura kan beih a ngai dawn a ni. Brighton nena kan game kha kan en let leh ang a, hma kan sawnna tur kan zir ho ang.

"Kan khelh leh hmabak hi a dang zar tawh dawn a nia, Europe-ah a ni tawh dawn a, a rang thei ang bera hma kan sawn a ngai tak meuh meuh a ni," tiin Erik ten Hag chuan a sawi bawk.

Nikum nipui lai khan Ajax atangin Ten Hag hian United a zawm a, team buai tak kha nasa takin a rawn siam tha. 

Champions League khel thei dinhmunah a hlangkai a, FA Cup final a luhpui bakah, League Cup a chawipui bawk.

Tun season erawh bul an tan chhe khawp mai, transfer window-ah player lei nan sum tam tak hmang thin mah se, United team-in trophy lian hlawhchhuak turin kawng dik a la zawh tak tak thei rih lo.