Premier League club Brighton chuan Ajax atangin Dutch defender Joel Veltman chu an lalut fela, ani hi tun nipui bazar-a Brighton player thar pahnihna a ni.

Brighton hian Veltman-a release clause an pe tla a, a manah hian pound 900,000 vel awrh chauh sengin, kum thum daih contract an ziahpuia, jersey no. 34 a ha dawn.

Brighton hi season thar atan an inbuatsaih nghal mawp mawpa, tun thla ni 27 atang khan nipui bazar inhawngin, free agent in Adam Lallana an lo lalut tawh bawk.

Kum 28 mi Veltman hi defender versatile tak a ni a, centre-back ah leh right-back ah a khel thei ve ve a, tawnhriat a ngah tawh nen Brighton tan player pawimawh tak a nih chhoh a rinawm.

Brighton manager Graham Potter chuan Veltman an lakluh chungchang sawiin, “Joel-a hi he club-ah kan lo welcome thei hi kan lawma, Ajax-a a awm lai khan Champions League leh Dutch national team lamah tawnhriat a ngah hle.

“Defender tha tak, right-back leh centre-back a khel thei ve ve a ni a, possession hold pawh a harsat lo. Premier League lama chona hmachhawn a chak tawh hle a, tunah Brighton player a ni ta hi kan lawma, a bula thawh kan chak tawh hle a ni,” a ti.

Veltman hi Ajax academy chhuak a ni a, kum 19 lai Ajax-ah awm tawhin, senior team lamah kum 2012 atang khan a khel tan. Vawi 200 chuan Dutch heavyweight tan hian khel tawhin, goal 10 a khung tawh.

Dutch league-ah Ajax hi vawi li a champion pui tawha, Champions League lamah pawh game eng emaw zat a lo khel tawh. Veltman hian a ram Netherlands tan vawi 22 a khel tawh bawk a ni.