Wrestling legend Bret Hart chu Las Vegas khawpuia Double or Nothing an neih tumin beisei loh deuhin a inlan ve thut mai a, AEW World Championship chu a hawng a ni.
Hemi zan hian Bret ‘The Hitman’ Hart chu inlan tura ngaih a ni miah lo a, mahse rin lawk loh ang deuha a inlan takah chuan mipuiin an lawm viau thung a. Vince MacMahon leh a hmelma Shawn Michaels te nen an inkar boruak a fuh loh avangin WWE lamah a reh daih a, wrestling khawvel atanga a inthiarfihlim hnua a inlan leh hmasak ber a ni.
AEW World Championship-ah hian Bret chuan a thianpa, a tag team partner thin Jim ‘The Anvil’ Neidhart hre reng chungin a kal ve a, anni pahnih hi 1980 leh 1990 chho vela The Hart Foundation hmachhuana an hnathawh vangin an lo chawimawi tawh a ni.
Wrestling khawvela a hmel hmuh tur a awm leh takah chuan The Hitman chanchin thenkhat han thlir kual ila.
Bret ‘The Hitman’ Hart hi wrestler awm tawh zingah chuan a tha berte zinga sawi tel ngei ngei a ni a. Khawvel hriata entertainment wrestling chawisangtu leh tilar zualtute zinga mi a ni a, wrestling nen chuan sawi hran theih a ni meuh lo a ni.
Canada rama piang a ni a, professional wrestling a luhchilh tirh atangin Canada aiawhin a tel chho ngar ngar a. A pa hi Canadian a nih laiin a nu chu Long Island, New York lam mi a ni a, hei vang hian Bret hi Canadian-American a ni a. Thlah pawlh a ni bawk a, Bret hi Canada leh USA khua leh tuia chhiar ve ve a ni.
A hma chuan Bret hian wrestler nih hi a tum ngai lo reng reng a, lemziak lamah a tui bawk a, cartoonist nih chu a chak ber a ni thin a. Cartoonist a nih loh vek pawhin film siamtu nih chu a thil chak em em a ni bawk.
Cartoonist emaw, film siamtu emaw nih chak viau mahse Bret Hart-a chhungte chuan wrestling an tuipui em em mai a, hei vang hian wrestling chu a luhchilh ve ta nge nge a. Wrestling khawvela a zuan luh tawh hnuah pawh cartooning leh film making lampang chu a thlah chuang lo a ni.
Entertainment wrestling khawvela a luh hnuah Bret Hart chuan title a la hnem hman hle a, a vaiin championship title 32 zet chu a kawl hman a ni.
WCW leh WWE lamah title 17 chu a la hman a, heng zingah hian WWE Championship title 5 leh WCW World Heavyweight Championship title 2 te a tel a ni.
1990 chho velah khan ni 654 chhung zet chu championship title a kawl thei a, WWE wrestler zingah chuan title kawl rei thei ber niin, US mi ni lo zinga WCW champion ni thei hmasa ber a ni.
Tun hnuah chuan superstar te chu kum 10 chhung WWE khawvelah an awm hman ta meuh lo a, WrestleMania-ah a zawnin vawi 10 pawh an tel hman tawh lo a. Bret Hart chu hetiang kawngah pawh hian mi aiin a danglam leh chiah a, WrestleMania-ah a zawna vawi 10 tel thei hmasa ber niin, a zawnin vawi 12 chu a tel hman a. WrestleMania 2 atanga WrestleMania 13 thleng khan a tel zawn vek a. Tun thlenga tel zawn rei thei ber chu The Undertaker niin, ani hi vawi 16 chu a tel zawn a ni.
Montreal khawpuiah Bret Hart leh Vince McMahon te chu an inbei a, an inbeih zawh hian boruak a sosang zui deuh a. Bret leh Vince te hi an intibuai zui a, Bret chuan Vince chu chiang zetin a hnek a, Vince hi nikhaw hre loin a tlu zui nghal a. Hemi atang hian an boruak a fuh ta lo a, wrestling khawvel atangin Bret ‘The Hitman’ Hart hi a reh zui ta a ni.