Brentford chuan an club chanchina player man to ber ni turin Kevin Schade chu German club Freiburg atangin an lalut a, kum 2028 June thla thleng daih contract an ziahpui.

Kumin January thla khan Brentford hian German winger hi loan in an lalut a, tun kar khan pound maktaduai 22 sengin a lei zui a, kum 21 mi hi kum nga daih contract an ziahpui a ni.

Kumin thlasik bazar laia Brentford a zawm hnuah, Schade hian Bees tan hian competition hrang hrangah game 19 a khel a, assist vawi khat a nei a, Schade hi tun nipui bazar chhunga Brentford player lakluh hmasak ber a ni.

Schade a lei hma hian Keane Lewis-Potter chu Brentford player man to ber a ni a, nikum khan Hull City atangin Brentford hian Lewis-Potter hi pound maktaduai 16 sengin an lei a, a man hian pound maktaduai 20 a la kai chho thei bawk.

Brentford director of football Phil Giles chuan Schade an lak ngheh chungchang sawiin, “Kum 2028 thleng daih contract kan ziahpui thei ta hi club tana thu lawmawm tak a ni. January-a loan-a kan lakluh khan Freiburg nen hian a ngheta lak zui theih turin inremna kan siam a, mahse Brentford hi Premier League-a kan awm zel a ngai thung. Kevin-a chungah hian kan lung a awi a, khelmual chhung leh pawnah a professional em em a ni,” tiin a sawi.