Inrinni zan khan Etihad Stadium-ah Brentford chuan 2-1 in mual neitu Manchester City an hneh, Ivan Tony goal hnih khung vangin World Cup hmaa an game hnuhnung berah City chu mak tak maia hneh niin, hmahruaitu Arsenal chuan si hnih faiin Wolves an lo hneh ve bawk a, an inkar hi point 5 a ni ta.

Inkhelh zawhah Manchester City head coach Pep Guardiola chuan, "Team tha chuan hnehna an chang thin, a tir atang khan kan tal buai a, an long ball kha kan chai hneh lo a ni ber. Ball chan tumin kan nawr a ngai, mahse tun tum chu a danglam, an defence a tha bawk si.

"Long ball hmang team lakah kan tlawm, tun tum chu kan khan lo a ni ber e. Game kha a harin a khirh khawp mai. An game plan a tha a, a tawp thlengin an che tha a ni.

"Champions League leh Premier League tha takin kan lo khel tawh thin a. Tunah rih hi chuan season second half atan kan lo inbuatsaih anga, kan lo kir leh ang," tiin a sawi.

Brentford head coach Thomas Frank chuan, "Hnehna kan chan te zinga lungawithlak ber nia ka hriat chu Play-off final kha a ni a, kan tum ram kan thleng ta kha a ni a. 

"City kan han hneh leh hi chu kan game mal anga result kan neih that ber tum niin ka hria. Khawvela club hausa ber pawl an nih laiin keini chu division-a budget nei hniam ber pawl kan ni a.

"Ka thlir dan atang chuan, dinhmun tha kan beisei tlat chuan chumi hlawhchhuah chu kan phu. Kan regular player 4 ngawt an khel thei lo, heti chunga hnehna kan han chang hi chu a ropui dangdai hle a ni," tiin a sawi.