Brazil No. 10 hak hi ka tum ngai lo: Neymar

18th October 2018, 10:10PM

Brazilian star Neymar chuan Brazil jersey number 10 chu hak a tum ngai loh thu sawiin, Dani Alves vanga ha ve chauh a nih thu a sawi.

Brazil ramah chuan ram tana khelh phak mai piahlamah No. 10 ha thei nih chu thil ropui taka ngaih a ni a. Jersey number rau rauah pawh a phur nazawng hak chi-ah an ngai lo a. He number ha thei tawh player te chu mi aia chungnung an ni zel hlawm a, Pele, Zico, Rivaldo, Ronaldinho tih vel te chuan he number hi an lo ha tawh thin a ni.

Selecao star ni mek Neymar chuan No. 10 em han hak chu a tum ngai loh thu a sawi a, a team-mate Dani Alves chuan tih luihna nen ha tura a nawr avang chauha ha ta a nih thu a sawi a. A hma chuan a ngaihsan em em Robinho hak thin No. 7 hak a tum thin niin a sawi.

“2013 Confederations Cup hma khan Luiz Felipe Scolari chuan jersey number hi a sem den den a, kei chuan 7 leh 11 ka ngainat thu ka lo sawi a. Mahse Dani Alves chuan rang deuhin min rawn en a, 10 ha tur ka nih thu sawiin, min nawr na hle a. A lung a awi lo mai dawna ka hriat avangin ka ha ta a, ka hak chhunzawm phah ta reng mai a ni,” tiin Neymar chuan a sawi.

Neymar hian No. 10 a chang ta chawt a, ram tan mai pawh ni tawh loin Paris Saint-Germain ah pawh he number tho hi a ha chho ta zel mai a. Brazil tana he number ha tawhte chu an hming a tha thei viau a, Neymar pawh hi a theuneu lo hle a, an ram tana goal thun hnem lamah pathumna a ni der tawh a ni.

Kum 26 chauh la ni mahse Neymar chuan ram tan game 94 a khel tawh a, goal 59 ngawt chu a thun tling tawh a. An ram tana khel hnem 10 zingah a lang pha der tawh bawk a ni.

Copyright © inkhel.com 2024. All rights reserved.