Brazil legend Zito a boral

16th June 2015, 02:06AM

Brazil tana World Cup tum hnih lai lo chawi tawhtu Zito, a hming tak Jose Ely de Miranda, chu kum 82 mi niin a boral.

Zito hian Brazil tan vawi 52 a khel hmana, defensive midfielder anga khel tlangpuiin 1958 leh 1962 ah te khan World Cup ah Brazil a champion pui a ni. A club football career chu Sao Paulo club Santos ah a hmang zo thaka, game 733 khelin goal 57 a khung bawk.

Santos tan captain te hial pawh niin a hunlaia footballer ropui ber ang hiala an sawi Pele te nen an khel ho thin nghe nghe. International football ah Zito hian a hming a chher zawk maha, Didi nen midfield partnership tha tak neiin 1958 World Cup a Garrincha, Vava leh Pele te ho vulna chhan pakhat an ni ti hiala sawi a ni thin.

1962 World Cup, Chile a khelhah pawh a che tha leh hle a, Fifa team of the tournament ah hial telh niin, final game Czechoslovakia laka ropui taka an "comeback" naah Brazil goal hnihna a khunga, 3-1 in Brazil in hnehna an chang a ni. He final ah hian Pele chu inhliam vangin a khel thei lo nghe nghe.

Santos club director te hial niin Barcelona leh Brazil star Neymar hmu fuh hmasa bertu a ni a, Santos ah kum 2003 khan kum 11 mi chauh niin a seng lut zui bawk. Neymar chuan Zito a ui zia tihian twitter ah a tarlang a. " Thu in Zito hi ka sawi fiah thiam lo, ka tana a thiltih zawng zawngte avang khan a chungah ka lawm tak meuh meuh a ni #RIPZito."

Kum kalta ah te khan Zito hi stroke vangin a lo na tawh thin a, a boral takah hian 1958 World Cup final a Brazil first XI te zingah Mario Zagallo leh Pele te chiah dam awmchhun an ni ta a ni.

Copyright © inkhel.com 2024. All rights reserved.