Brazil chuan Group match hnihah hnehna chang ve vein 2022 Qatar World Cup Round of 16 an lut ta a, match hnih an khelh atangin goal thum khungin, goal an chhuah lo bawk a ni.

Thawhtanni zan khan Switzerland an hmachhawn a, Manchester United midfielder Casemiro goal khat hmangin si khat faiin Brazil an chak a, khelh hnih atangin point 6 an hlawhchhuak ta a ni.

Brazil 1-0 Switzerland
(Casemiro 83')

Brazil XI: Alisson, Militao, Thiago Silva, Marquinhos, Alex Sandro, Fred, Casemiro, Paquetá, Raphinha, Richarlison, Vinicius.

Switzerland XI: Sommer, Widmer, Akanji, Elvedi, Rodriguez, Freuler, Xhaka, Rieder, Sow, Vargas, Embolo.

Group G match dangah Serbia leh Cameroon-te 3-3 in an inhnehtawk, anni hian point khat ve ve an hlawhchhuak a, Switzerland chu chak zo lo mah se point 3 neiin an dinhmun a la ziaawm hle. 

Group Match hnuhnung berah Brazil leh Cameroon an inhmachhawn ang a, Switzerland leh Serbia an inhmachhawn bawk ang a, Brazil tih loh team dang pathum te hian Round of 16 luh an inchuh dawn a ni.

Si khat faia Switzerland an hnehna goal hi second half minute 83-a lut a ni a, mual veilam sir atangin Vinicius Jr. chuan ball tha takin a lai lamah a tlan luhpui, Rodrygo tan pein, ani hian vawi khatah box chhunga awm Casemiro tan a pe ve leh nghal. United midfielder hian khawih kawi lovin na takin a hlap nghal a, a goal mawi hle.

Brazil hian Switzerland hi hmachhawn hautak an ti ve hle, an inkhelh hnuhnung pahnihah Swizerland an chungnung zawk bawk a. Tite chuan 4-3-3 formation hmangin bul a tan, Switzerland coach Murat Yakin chuan 4-2-3-1 formation a rawn hmang.

First half-ah Brazil lam chungnung hret mah se chance hlauhawm vawi khat vel bak an nei thei bik lo, mual dinglam sir atanga Raphina cross chu Vinicius Jr. chuan a volley, Switzerland goalkeeper Sommer chuan a lo dan sak.

Tite chuan second half tirah Rodrygo a dah lut, ani hian game a rawn ti nung hle. Guimaraes, Antony leh Jesus te a dah lut chhunzawm a, 4-2-3-1 formation an rawn hmang ve, hetah chiah hian Switzerland tlar hnung sut tlang harsa tak chu an chhu ta dawt dawt mai.

Casemiro hmangin goal an khung ta nge nge a, Rodrygo pawhin chance hlauhawm vawi hnih a nei a, an lo dan sak ve ve hlauh. Inkhel hmuhnawm tak tia sawi tur ni lo mah se tactic an thlak kual dan erawh a ngaihnawmin a hmuhnawm hle. 

Team chungnung zawk chu Brazil an ni a, chak pawh an phu, Switzerland pawh an khawng hle tih a chiang, point 3 an nei tawh bawk a, knock out stage lut turin an dinhmun a la ziaawm hle a ni.