​Brazil chakna Neymar leh Costa

15th June 2015, 04:06PM

Tukin zing Copa America Group C match-ah Brazil chuan 2-1 in Peru an hneh a, Brazil tan hian Neymar leh Douglas Costa ten goal an khung.

Brazil 2-1 Peru

(Neymar 5′ Douglas Costa 90′) (Cueva 3′)

Brazil : Jefferson, Dani Alves, Miranda, David Luiz, Filipe Luis, Mendes Trindade, Fernandinho, Willian (de Barros Ribeiro - 87' ), Fred (Barbosa de Oliveira - 75' ), Neymar, Tardelli Martins (Douglas Costa - 66' )

Peru : Gallese, Advincula, Zambrano, Ascues, Vargas (Yotún - 88' ), Lobatón, Ballón, Sánchez, Farfán (Carrillo - 83' ), Cueva (Reyna - 82' ), Guerrero

Brazil hian an opening match hi an khel tha lo hle a, goal pawh an chhuah hma hle. 2014 Brazil World Cup-a an defender te chetsualna rau khan a la thlah lo ni tur a ni, tan atanga minute 3 lekah defender te tihsual vangin Cueva chuan Peru tan goal a khung.

David Luiz-a back pass hlauhawm tak chu Brazil goalkeeper Jefferson chuan chhe takin a clear a, hei hi nangchingin Cueva chuan goal a khung ta. Mahse Brazil hian an si phurh hi an rul leh ta vat a, 5th mins-a Alves cross tha zet chu Barcelona forward Neymar chuan tauh goal-in, 1-1 a ni.

An intum tawk hle a, Neymar a hlauhawm thei hle, bar a tih per bakah a thuai goal teuh thin hle. Hun tawp dawn tak tak injury time-ah Neymar ball pek tha zet chu Shakhtar Donetsk forward Douglas Costa chuan goal-ah a chantir, Brazil chuan 2-1 in hnehna an chang ta a ni.

Group C match pakhat zawkah Venezuela chuan si khat faiin Colombia an hneh tlat mai. Goal awmchhun hi Jose Salomon Rondon khung a ni.

Inrinni khan match thum a awm a, Group A match-ah Mexico leh Bolivia goal awm lovin an inhnehtawk, Group B match-ah Uruguay chuan si khat faiin Rodríguez goal hmangin Jamaica an hneh a, Argentina leh Paraguay te chu 2-2 in an inhnehtawk.

Argentina hian Aguero leh Messi penalty goal hmangin first half-ah 2-0 in hma hruai mahse second half 60th mins ah Valdez chuan Paraguay tan goal hmahruai a khung a, hun tawp dawn tak tak 90 mins-ah Barrios Caceres chuan Paraguay si phurh a rul a, 2-2 in an inhnehtawk ta a ni.

Copyright © inkhel.com 2024. All rights reserved.