American boxer kum 27 mi Patrick Day chu Charles Conwell nena an inhnek tuma a hliam tuar lovin nimin (16/10/19) khan a boral.

Chicago-ah Day leh Conwell-te hian kar liamta Inrinni khan an inhneka, he super welterweight bout-ah hian Conwell chuan Day hi round 10-naah a knock-out a, Day hi ring atanga zawn chhuah a ni a, damdawi in lam panpui niin, ni li chhung enkawl a nih hnuah a hlaim tuar lovin a boral zui ta a ni.

Promoter Lou DiBella chuan Day-a boral chungchangah thuchhuah siamin, “Ka tan chuan ka fapa ang a nih bakah ka unaupa ang a ni a, mi tam tak tan thian tha tak a ni. A nungchang mawi leh a ngilneihna rilru te avang hian a mah hretu te hian kan theihnghilh tawh ngai dawn lo a ni,” a ti.

Day-a inhnekpui hnuhnun ber kum 21 mi Conwell pawh Day a boral chungchangah thuchhuah siam ve bawkin, “Heti ang hi i chunga thlen tir hi ka tum a ni lova, hnehna chan mai kha ka tum a ni. Hun ko kir leh thei ila chu ka ko kir ngei anga, heti ang hi tu mahin an phu lo a ni,” a ti.

Day hi vawi 22 a inhnek hmana, heng bout 22 atang hian vawi 17 hnehna changin, vawi li a tlawma, vawi khat a tumpui a inhnehtawkpui hman bawk.

Boxing khelh avanga boral hriat tur hi a khat tawkin an awm renga, kumin July thla mai pawh khan Russian boxer Maxim Dadashev leh Argentine boxer Hugo Santillan-te chu boxing-a an hliam tuar lovin an lo boral tawh bawk a ni.