26 Mar 2015 06:41

Inkhel

Mizo Sports Website hmasa ber

Boxing Training Centre hawn a ni ta

Thawhlehni tlai khan Ramhlun Sports Complex-a Boxing Training Centre sak zawh tak chu Chief Minister Pu Lal Thanhawla'n a hawng a, hemi rual hian kum tina neih thin 12th Mizoram Inter District Boxing Championship a hawng nghal bawk.

Mizoram district hrang hrang inelna Inter District Boxing Championship-ah hian boxer 110 vel an tel thei a, Mizoram Boxing Association chuan R&J Exam a buatsaih nghal bawk. Tin, kum 2015-17 chhunga MiZBA hruaitu tur chu ningani hian an thlang nghal bawk ang.

Ramhlun Sports Complex-a Boxing Training Centre thar hi cheng nuai 150 senga sak a ni a, chhawng hnih a sang a ni. Chhawng hnuai zawkah room chi hrang hrang - Coach room, Dormitory (Boys & Girls), Choka, Store Room, Toilet 4 leh Bath room 4 te a awm a. Chhawng chungah Boxing training hall awmin mipa leh hmeichhe inthlakna tur pindan hrang balah inthiatna hmun 2, MIZBA office te awm bawkin Boxing Ring pahnih dah a ni bawk.

He training centre hawngtu Chief Minister chuan kum 1960 velah Pu Khawtinkhuma in, Assam Type Building hnuaiah Boxing Ameteur an lo din chhoh dan sawiin tunah hmasawn zelin boxing khelhna tur atana building tha tak mai bakah a tul huna hmeichhia leh mipa camp theihna tur leh riahna tur thlenga Mizoten kan lo nei ta chu lawmawm a tih thu leh thalaite tana khawvel thar buatsaih chu sorkar-in a tum ber anih avangin zirna lamah te, infiamna lamah te, music & fine arts lamah te nasa taka hma an lak dan sawiin thalaite an vanneiin infiamna hrang hrang ah an hma a eng a, mizo mipui te pawhin an lakah beiseina kan nei sang hle a ni a ti.

Chief Minister chuan training centre satu contractor-in tha taka a sak chhuah avanga lawmthu sawiin ringtu kan nihna hi kan hnathawhah a lang tur a ni, a ti a. Kan ram kan hnam rohlu pawimawh tur duhdah taka an sa thin hian rilru a ti na a, chutih lai karah mi rinawm tak tak an awm thin hi a lawmawm a ti a. Building thar chu a hmang tur apiangin uluk tak leh fai taka vawng reng turin a ngen a. District Hqrs. tinah Boxing Ring dah anih bakah a hall te pawh ngaihtuah sak mek zel an nih thu sawiin Boxing lama hmala tu leh hruaitu mi chhuanawm leh mi thiam tak tak an awm chu thlamuanthlak a tih thu a sawi.

Khualzahawm Pu Zodintluanga, Sports Minister pawhin thu sawiin training-na a tan hian sports discipline hrang hrang ten hmun an in chan lo thin a, tunah chuan Boxing atan bik training-na hmun tha tak a lo awm ta chu lawmawm a tih thu sawiin discipline dangte pawh hmun hrang hrangah training na buatsaih sak mek an ni a ti a. Sorkar-in infiammi te tan theih tawpin hma a la in a rah pawh kan hmu chho mek tawh a. Inthlahdah mai lova tanlak zel a ngai a ni, a ti bawk.

Boxing Training Centre hawnna programme hi Pu Zothankhuma, IAS, Secretary, Sports & Youth Services in a kaihruai a. Pu C. Laltlanthanga, Secretary, Mizoram State Soprts Council in technical report a pe a, Pu Zothanmawia, Director, Sports & Youth Services in lawmthu a sawi bawk.

Rate this item