24 Apr 2020 04:40

inkhel

Boxing trainer tha ber pawl ka ni thei: Floyd Mayweather Jr

Floyd Mayweather Jr chuan trainer nih a tum thu sawiin, khawvela boxing trainer tha ber pawl a nih theih a rin thu a sawi.

Boxer ropui Floyd Mayweather Jr chuan hneh loh nei miah loin inhnek a chawlhsan a, a vanglaiin weight division chi hrang hrang pangaah world champion a ni thei a. Kar hmasaah khan trainer tha ber pawl a nih theih tur thu hi a sawi a ni.

Mayweather chuan, “Trainer tha tak tak chuan fighter te thatna an hria a, boxer te chu a tha thei ang berin an pho chhuak thei thin a, an theihna zawng zawng hmang thei turin an kaihruai thin,” a ti.

“Engtikah emaw chuan trainer la nih ngei hi ka tum a, chutiang lampang ka luhchilh hunah chuan khawvela boxing trainer tha berte zingah ka tel ngei pawh ka ring a ni,” a ti bawk.

Khawvela trainer tha ber bera sawi thinte hi an vanglaia boxer tha tak tia sawi an ni ngai kher lo a. Trainer lar tam zawk hi world title pawh la miah lo an ni hlawm a, champion thei dinhmuna ding hnaivai lo tak tak an ni fur hlawm a ni.

Eddie Futch pawh a hriselna a that tawk loh avangin professional boxer a ni thei ta lo a, heti chung hian world champion ni thei tur khawpin boxer 21 chu a chher thei a. A chher chhuah zingah chuan vawi world heavyweight title la thei panga an awm tawh a, Muhammad Ali hneh theitu mi 5 zinga 4 te kha a chher an ni.

World champion 40 ngawt chher thei Manny Steward pawh professional boxer a ni lo a, amateur boxer niin, heti chung hian Tommy Hearns, Lennox Lewis leh Wladimir Klitschko te chu a chher chhuak tho a ni.

Muhammad Ali, Sugar Ray Leonard leh boxer dang 14 zette chher chhuaktu Angelo Dundee phei chu a dam chhungin vawi khat mah boxing ring chhungah a inhnek ve miah lo a ni.