Boxing trainer hmingthang tak Enzo Calzaghe-a chuan khawvel a chhuahsan ta. A thih hian kum 69 na a hmang meka, boxer lar tak Joe Calzaghe a pa niin, a trainer a ni tel bawka, weight category pahnih ngawta a fapa Joe Calzaghe a champion theihna kawnga mawhphurtu lian tak a ni.

Calzaghe a thihna hian boxing khawvel a thrawng hle a, boxer tam tak pawhin an ui thu an sawi chhuak nasa hle. Amah hi pa nelawm tak niin; khawvel boxer tha tam tak a lo chher chhuak tawh a ni. Kum 2014 khan a fapa Joe Calzaghe-a chu International Boxing Hall of Fame-ah lakluh a ni a, hemi tum hian Calzaghe-a chuan a pa zirtirna hnuaia thleng thei anih thu a sawi nghe nghe.

Kum 2007 khan 'Ring Magazine trainer of the year' a dawng a, heta tang hian khawvelin a hmelhriat tan a tih theih awm e. Boxing chawimawina dang pawh a dawng nual.

Kum 10 chhung zet chu a fapa boxing coach angin a awm a, world middleweight champion anih theihna atan a hrual nasa hle a, kum 2008 khan light heavyweight lalpa an tih mai Bernard Hopkins laka a fapa Joe Calzaghe-a'n hnehna a chan theih chhan pawh a boxing zirtirna zarah a tih theih ang.

Boxer lar tak Tony Bellew-a chuan, " Boxing khawvela mi ropui a awm ta lo, coach ropui tak, boxer rothap tak tak chher chhuak tawhtu, boxer ropui Joe Calzaghe-a ngei pawh hnehloh tawng lova chhertu, @Joe Calzaghe, ka lo tawngtai pui reng ang che u," a ti bawk.