Indian Boxing Federation buaina chinfel a nih hnuah kalphung pangngai taka bul tan chhoh leh mek a ni a, Indira Gandhi Stadium, New Delhi-ah January ni 16th-22nd, 2017 chhung khan IBF chuan 1st Youth (Men & Women) National Boxing Championship buatsaihin Mizoram Boxing team chuan medal pathum - gold 1, silver 1 leh bronze medal 1 an dawng a, he hlawhtlinna hi Mizoram State Sports Council chuan infiammite inpui, MSSC Office, Upper Khatlaah Febuary ni 1, Nilaini chawhma dar 11:00 khan a buatsaih.
He huna khual lian Pu John Kima, Vice President, Mizoram State Sports Council chuan, " Player tam tak chu Mizoram champion an ni a, an hawi chapo nghal mai thin. Hei hi a bul tanna chauh a ni a, tunah chuan India mai pawh ni lo, khawvel hi kan cho a ngai tawh a ni. Infiammi sawrkar hna hmu theite hi an lawmpuiawm rualin tam tak erawh chuan an tlakchhiat phah zawk niin a hriat a. Miin a lungawina a hmuh tawh chuan beisei a nei tawh lova, hniam lam a pan mai thin. Beiseina hian mihringte min tichak a, hlawhtlinna min petu a nih avangin sang zawk beisei zel kan tum tur a ni" tiin Mizoram tana medal latute a fuih.
He champinship-ah hian India rama state hrang hrang atangin boxer mipa 230 leh hmeichhia 162, an vaiin 392 an tel a, Mizoram Boxing Association (MiZBA) chuan boxer mipa 6 leh hmeichhia 5 a tir ve bawk. Weight category 10 ve veah inelna neih a ni.
Vanlalhriatpuii, Champhai chuan 60Kg huangah gold medal lain 1st round a bye a, pre-quarterfinals-ah Jharkhand boxer chu round hmasa berah a knockout. Quarterfinals-ah Odhisa boxer chu 1st round-ah a knockout zui leh a, semifinal-ah Assam 5-0 a hnehin final-ah Haryana boxer chu Split decision (4-1) in a hneh a, a champin ta a ni. Hriatpuii hi Most Promising Player-ah thlan a ni nghe nghe.
Mizoram tana silver medal latu Palian Lalnunfeli, Lalen khua chuan 54Kg huangah 1st round bye-in pre-quarterfinals-ah Uttarakhand 5-0 in a hneh a, quarterfinal-ah Andra Pradesh chu 1st round-ah a knockout zui leh. Semifinal-ah Delhi boxer chu Split decision (4-1) in a hneh a, final-ah Haryana boxer tumin 0-5 in a chak ta lo a ni.
Bronze medal latu Laldingliana, Tuipui khua chuan 56 Kg huangah 1st round a bye a, prequarterfinals-ah Chandigarh boxer 3-2 a hneh lehin quarterfinals-ah J&K boxer chu 1st round-ah a knockout a, semifinal-a a khingpui Services boxer chu 0-5 in a hneh ta lova, bronze medal a dawng ta a ni.
script async src="//pagead2.googlesyndication.com/pagead/js/adsbygoogle.js">
(adsbygoogle = window.adsbygoogle || []).push({});
1st Youth (Men & Women) National Boxing Championship 2017-ah hian Services Sports Control Board (SSCB) chu boys team champion an ni a, Haryana pahnihna niin girls team champion chu Haryana an ni a, Punjab pahnihna an ni ve bawk.
Mizoram team coach C.Vanlalchhuanga, SYS chuan India ram khawpui ber Delhi leh state changkang zawkah te an infiamna hmunhma te chu Mizoram aia that bikna a awm loh thu leh a pawimawh ber chu infiammite rilru a nih thu a sawi a, Indian boxing Federation-in buaina a tawh avangin boxer tam takin hei hi an chhiatpui hman a, tunah erawh kalphung pangngai a zawh leh tawh a ni tiin ram tihmingthatu Mizo infiammiten hlawhtlinna sang zawk an chan zel theih nan sawrkarin lawmman tha tak a peklet ve a ngai a ni a ti bawk.
He hun Pu James Lalramnghaka, AE chuan kaihruaiin Mizoram team manager Pu Lalhmingmawia Ralte, Joint Secretary, MiZBA leh Pu H.Thangchungnunga, SPO, MSSC ten thu an sawi ve bawk a, medal latute hnenah lawmpuina thilpek hlan an ni.
script async src="//pagead2.googlesyndication.com/pagead/js/adsbygoogle.js">(adsbygoogle = window.adsbygoogle || []).push({});