Wladimir Klitschko chuan boxing ring luhchilh leh a hreh loh thu sawiin, a rilrem zawng tak a inher chhuak a nih chuan inhnek leh chu pawi a tih loh thu a sawi.

Klitschko (64-5, 53 KOs) hi April 2017 khan Anthony Joshua nen an inhnek a, Joshua nen an inhnek hnu, August, 2017 khan boxing a chawlhsan thu a puang zui a. Hemi hnu hi chuan chanchin a nei lo zui vang vang a, tun hnaiah thawm a rawn nei ve leh tan chiah a ni.

“Thil reng reng hi nghet bur a awm thei tlat lo a, eng pawh hi a inthlak danglam thei vek a ni,” tiin Klitschko chuan a sawi a. “Ngaihdan te, pawm dan te chu miin an dam chhungin an thlak fo alawm,” a ti bawk.

A sawi zelnaah, “Arnold Schwarzenegger hi kan en chuan infiammi a ni a, a hnuah actor a ni leh a, chumi hnuah politician ni lehin, sumdawngmi a ni leh a. Thil hi a pangngai reng lo a ni tih lantirtu langsar tak a ni ka ti lo thei lo a. Hetiang bawk hian ka dinhmun pawh hi inthlak danglam thei reng a ni,” a ti.

“Tu emaw tanpui a hun nia ka ngaih chuan boxing ring chu ka luhchilh leh mai ang,” tiin Klitschko chuan a sawi.

Wladimir Klitschko chuan, “Kum 27 chhung boxing khawvela ka tal chhung khan hun tawn ropui deuh deuh sawi tur ka ngah mai a, thil tam tak ka zir chhuak a, boxing ka luhchilh tirh atanga ka tum ber pawh a tam thei ang ber inzir thar hi a ni,” a ti a.

“Ka suangtuah phak loh thil tam tak ka hlen chhuak nual tawh a, ka ngaihtuah phak bak thil ka ti teuh tawh bawk a, thil chi hrang hrang hi boxing vangin ka tawng hnem tawh a. Nelson Mandela sawi ‘Infiamna hi khawvel pum huap thil a nih avangin khawvel kalphung a thlak danglam thei a ni’ tih hi ka rilruah a awm fo thin,” tiin a sawi.