Conor McGregor chuan boxing ring luhchilh leh a tum niin an sawi a, Irish champion Luke Keeler nena inhnek chu a remti niin an sawi.

UFC star Conor McGregor chuan Drimnagh, South Dublin-a Marble Arch-ah April 6 khan mipa pakhat chu kut a thlak a. Hetianga mi kut a thlak avang hian Conor chu an sawisel nasa hle a, thuneitute pawhin thil awm dan an chhui chiang a, thubuai an siamsak ngei a rinawm hle.

Hetiang boruak karah hian middleweight boxer Luke Keeler chuan Twitter kal tlangin McGregor hi a sawisel nasa hle a, MMA champion hlui hian a thianpa pawh a lo tibuai tawh niin a sawi bawk.

Kum 32-a upa Keeler chuan Conor McGregor chu a cho zui a, a hnuah chuan thinrim deuha phone hmanga an inbiak hnuah an pahniha inhnek pawh a remti niin a sawi zui.

Luke Keeler chuan, “Hemi chungchang hi ka sawi thui vak duh rih lo a, mahse Conor kha ka thil sawi chhuah avang khan a lawm vak lo tih chu ka hre chiang a, lawm lo tak a ni,” a ti.

“Ireland rama insual thinte khawvel hi a zau vak lo hle a, hei vang hian thil thleng engkim hi kan inhre tawn zung zung zel a. Conor hian ka thil tih a hriat veleh phone hmangin min rawn be vat a, eng eng emaw chu kan sawi nual,” a ti bawk.

A sawi zelnaah, “Kan inbiaknaah hian inhnek chungchang ka sawi chhuak a, Conor pawh hian a pawm nghal thlap a. Phone atanga kan inbiak hian kan pahniha inhnek chu a remti ve ngei a ni,” a ti.

McGregor hian 2017 kumah khan UFC huang pawnah boruak a nei a, boxing legend Floyd Mayweather nen Las Vegas khawpuiah boxing ring chhungah an inhmachhawn a. Hemi tum hian Irish fighter hi a chak lo zawk a, round 10-naah Mayweather chu chakin, an inhnekna atang hian Conor chuan £80 million zet a hlawh chhuak a ni.

Keeler hian 17-2-1 boxing record a nei mek a, management company MTK chuan Conor nen an inhnek theih nan hma an la chho dawn nia sawiin, McGregor chu thil an sawipui tan niin a sawi.

“Hemi chungchang hi a sawia sawi chauh a ni ve thei tih chu ka hre ve vek a, a takah a thleng kher lo thei a. Boxing ring chhungah hian lut leh ngam turin huaisenna a la nei ang em tih chu ngaihtuah hmasak a ngai a a. Kei chuan inhnek hi ka ngam a, ka duh bawk a, eng thil nge lo thleng zel dawn tih chu kan lo thlir dawn ania,” a ti.

“Engkim hi MTK kutah ka dah a, anni hian Conor McGregor chu an be tan tawh a, kan inhnek dawn leh dawn loh chu hunin a la hril vat turah ka ngai,” a ti bawk.

Kumin April thlaah khan Conor McGregor chuan boxing ring chhungah hun a hmang a, a club hlui Crumlin ABC ah The Notorious hian local boxer Michael McGrane chu Good Friday-ah khan a hmachhawn a ni.