Naktukah hian London-ah Manchester United defender hlui Rio Ferdinand chuan press conference a nei dawn, hetah hian a tih atana kan lo rin loh thil thar a puang dawn niin a sawi.

Kum 38 mi Rio Ferdinand hian professional boxing a luhchilh dawn nia sawi a ni a, kum upat lamah cricketer Freddie Flintoff angin boxing a khel dawn nia ngaih a ni.

Flintoff khan boxing a luhchilh a, pro fight-ah vawi khat inhnekin a khingpui American boxer Richard Dawson a hneh nghe nghe a nih kha.

Towie star Kate Wright nena inhnimhnai tak nia sawi Ferdinand hian instagram lamah boxing training a neih lai a tarlang a. Professional boxing a luhchilh a nih chuan sports khawvel a barakhaih dawn chiang a ni.

Hmani deuh khan Tyson Fury, David Haye leh Tony Bellew te pawh a intehkhin a nih kha, khami tum khan fiamthu mai niin an ngaihsak a, tunah erawh boxing a luhchilh tak tak dawn ta niin a lang.

Anthony Joshua-a'n Wladimir Klitschko a KO tum khan ring chhungah rawn lutin Ferdinand hian Joshua-a belt a rawn ken sak nghe nghe a nih kha.

Sports dang atanga boxing-a inlet sawi tur hi an awm leh zauh thin a, Sheffield United leh Birmingham player hlui Curtis Woodhouse leh Norwich player hlui Leon McKenzie pawhin boxing an luhchilh.

Hetih lai hian Ferdinand hian a career thar atan boxing hman a tum erawh a rinawm chiah lova, bout hnih khat erawh a khelh ngei a rinawm a ni.