Boxing leh Weightlifting-a Medal la te lawmpui na hun hmang

19th December 2016, 08:12PM

Boxing leh Weightlifting-a India ram pum huap inelna liana Mizoram tana medal latute lawmpuina hun chu December ni 19, Thawhtanni chawhma dar 11:00 khan Mizoram State Sports Council chuan Infiammite Inpui Upper Khatla-ah a buatsaih a, tun tum hi kum 2016 chhunga Mizoram State Sports Council-in medal lawmna hun a buatsaih hnuhnung ber a ni tawh ang.

Kum engemawzat Senior National Boxing Championship neih a nih loh hnuah Dec.8-13, 2016 chhung khan Guwahati-ah Boxing Federation of India chuan 1st Elite (Sr.) Men's National Boxing Championship buatsaihin Mizoram chuan boxer 7 a tir a, John Kenty Vanhlimpuia, Tuipui chuan middleweight-ah silver medal dawngin final-ah Services boxer a hneh lo hlauh. 52 Kg huangah Tuipui boxer dang Laldinmawia chuan final a lut zo lova, semifinal-ah chak lovin bronze medal a dawng ve bawk.

(adsbygoogle = window.adsbygoogle || []).push({});

November ni 29 atanga December ni 4 chhung khan Odhisa-ah 12th Junior national Weightlifting Championship neih a ni a, hetah hian Jacob Vanlaltluanga chuan 50 Kj Sub Junior-ah silver dawngin snatch-ah Kg83, Clean & Jerk-ah Kg107, a vaiin Kg.190 a chawi a. Zakhuma chuan Sub Junior 56 Kg-ah silver medal bawk dawngin Snatch-ah kg.101, Clean & Jerk-ah Kg 126, a vaiin Kg.227 a chawi bawk a ni.

Mizoram tana medal latute lawmpuina huna khual lian Pu C.Laltlanthanga, Secretary, MSSC chuan, " Mizoram tana medal latute leh an thiltihte avangin Sports Department chu Mizorama department lar ber a ni tawh a, Mizoram mai ni lo, India rama department hnathawkchak ber a ni. Khawvelah pawh keini tluka Department hnathawkchak hi an awm bik lovang" a ti.

Khual lian chuan, " Kan players te lakah beisei kan nei sang a, a tirtu leh buaipuitute pawh kan tum a san ve a ngai. Kan tum ber chu Olympic medal a ni a, mahni tuala invai vung mai lovin a thawktute pawhin a hmun ngeiah Olympic kan chhim thin a, hnam changkang leh sang zawkte kalphung leh tihdan kan zir reng thin a ni. Chung en lovin khawvel hi kan chhuk thlir zawk tur a ni a, hlau zawkah tang lova, mite hlauh nih kan tum zawk a ngai" tiin fuihna thu leh an kal zelna tura duhsakna thu a sawi.

Medal lawmna hun hi Pu H.Thangchungnunga, Sports Promotion Officer, Mizoram State Sports Council chuan kaihruaiin Mizoram Boxing Association Vice President Pu.F.Lalninenga leh Pu Lallianthuama, Vice President, Mizoram Weughtlifting Association-ten thu an sawi a, MSSC chuan medal latu leh team official te hnenah lawmpuina thilpek a hlan theuh bawk.

(adsbygoogle = window.adsbygoogle || []).push({});

Copyright © inkhel.com 2024. All rights reserved.