Boxing Hall of Fame-ah Vitali Klitschko an lalut

12th June 2018, 12:06AM

Vitali Kitschko chu Pathianni khan Boxing Hall of Fame-ah lakluh a ni a, a rual hian midang pawh an lalut ve bawk.

Nikum December thla khan Vitali Klitschko hi Hall of Fame-a lakluh an lo remti tawh a, Klitschko bakah hian division 4 world champion Erik Morales, light middleweight champion Ronald ‘Winky’ Wright bakah Sid Terris te chu an lalut nghal bawk a ni.

Vitali chuan, “A tak pawh a ang lo, mumang ang mai a ni,” a ti a. “Hall of Fame-a lakluh ka nih hi ka ring pha ngai lo a. Eng tikah emaw United States-ah world champion ka la ni ang tih pawh hi ka ngaihtuah pha ngai lo bawk a. Boxer ropui tak takte nen huang khata kan awm thei tur hi a ropui ka ti a, Muhammad Ali te nen kan awmho ta chu ania, inchhuanna tham chu a tling ve chiang a ni,” a ti.

Feet 6 leh inches 7 a sang, ‘Dr. Ironfist’ tia a hming lem an vuah Vitali hian Ph.D. a nei a, Ukraine-ah politics a luhchilh a, hemi hnu kum thumah Hall of Fame-ah hian lakluh a ni a. Wladimir hi Soviet athletic system hrual chhuah niin, a nau Wladimir nen heavyweight khawvelah ro an rel rei hle.

Broadcaster Steve Albert leh Jim Gray te bakah German promoter Klaus-Peter Kohl te chu an chawimawi tel bawk a. Ring announcer Johnny Addie leh promoter Lorraine Chargin te pawh an chawimawi zingah hian an tel.

Klitschko hi Kiev mayor a ni mek a, 1996 atanga 2013 thleng khan professional boxing a khel a, vawi 45 a chak a, heng zinga 41 te hi a knock out nghe nghe a. Chak loh hi vawi 2 chu a nei ve a ni.

An lakluh ve bawk, Erik Morales chuan weight division li title a kawl thin a. ‘El Terrible’ an tih thin, Mexican boxer hian a pa hnung zuiin boxing a khel chho a, NABF leh WBC super bantamweight title te a la a. 2001 khan Guty Espadas Jr. hnehin WBC featherweight title a la a, 2004 ah WBC leh IBF super featherweight title lain, 2011 khan Pablo Cano a hneh a, WBC light welterweight title a la bawk a. Boxing a chawlhsan chuan a record chu 52-9 (36 KOs) a ni.

Ronald ‘Winky’ Wright chu Washington, D.C., atanga chawr chhuak niin, feet 5 leh inches 10 a sang, southpaw a ni a. 1995-96 leh 2000 te khan NABF light middleweight title a la a, 154-pound title vawi 4 ngawt a la bawk a. Middleweight-ah telin Sam Soliman leh Felix Trinidad te a hneh bawk a, 2012 khan boxing a chawlhsan a, a record chu 51-6-1 (25 KOs) a ni.

Copyright © inkhel.com 2024. All rights reserved.