31 Jul 2019 10:47

bakteaJr.

Mizo tlangval

​Boxing: Dillian Whyte-a title an hlihsak

WBC chuan an interim title kawl mektu Dillian Whyte chu a thisen zunzamah damdawi phalloh hnuhma hmuh a nih avangin a WBC interim world heavyweight title an hlihsak rih.

Kar hmasa khan Whyte hian drug-test a paltlang zo lo tih hi puan a ni a, finfiah tuma hmalak mek niin tuna tan WBC chuan a interim tilte kawl lai chu an hlihsak rih ta a ni.

Kum 31 mi British boxer Whyte chuan an thiamthu sawina hun a nei dawn a, WBC hnenah inlanna hun pek ni dawnin, thiam a chan chuan a title hi pek kir a ni leh anga, thiam loh a chang a nih chuan a hremna hi eng ang taka na nge ni dawn a la hriat loh.

Whyte hi kum 2012 leh kum 2014 inkar khan phalloh thil a taksaa a lakluh palh avangin hrem a lo ni tawh a, tunah hian thiam loh a chang leh a nih chuan kum riat vel tal hrem a ni thei tawha, a thisen zunzama phalloh thil hmuh hi mipui nawlpui hriat tura puanzar a ni lem lo.

Whyte hian tun thla ni 20 khan Oscar Rivas chu unanimous decision-a hnehin, hemi an inhnek hmaa drug-test neihah hian a taksaa phalloh thil hmuh a ni. Whyte hian Rivas-a lakah eng mah phalloh damdawi a hman loh thu leh ‘fair’ taka Rivas chu a hneh thu a lo sawi chhuak ve tawh bawk.

Whyte hi vawi 27 inhnek tawhin, vawi 26 a chak tawh a, Rivas a hneh avang hian WBC heavyweight champion lai Deontay Wilder chu tum hmasa ber tur a ni nghala, mahse hei pawh hi tunah chuan hman theih a ni dawn rih lo a ni.