Tyson Fury hi a hmingpum chu Tyson Luke Fury a ni a, kum 1988 August thla ni 12 khan Manchester-ah lo piangin tunah hian kum 31 mi a ni mek.

Fury hi tunah hian WBC world heavyweight champion a ni meka, hemi bakah hian The Ring magazine champion niin heng hi thla hmasaa Deontay Wilder a hneh tuma a hlawhchhuah te kha a ni.

6 ft 9'-a laia sang Fury hian fight 31 a nei tawha, kum 2018-a Wilder nen an inhnehtawk tih loh kha chu a la chak fai veka, fight 30 hnehna a chan tawhah vawi 21 chu knockout hmangin a chaka, vawi 9 decision hmangin a chak tawh bawk.

Fury hi unified WBA, IBF, WBO, leh Ring magazine world heavyweight champion hlui a ni a, heng title-te hi kum 2015-a Wladimir Klitschko-a hneh tuma a hlawhchhuah an ni.

Klitschko a hneh avang hian Fury hian Fighter of the Year lawmman leh Upset of the Year lawmman te a lo dawng tawh nghe nghe. Mahse a IBF title a hlawhchhuah hnu atanga kar hnih hnu lawkah a IBF title hi hlihsak a ni .

Kum 2016 khan Fury hi zu lamah a talbuai avangin a inhnek hleithei lova, hemi avang hian a WBA leh WBO –te chu a dah awl zui leh bawka, kum 2018 khan Ring chuan an title a kawl chu an chhuhsak leh bawk a ni.

Kum hnih vel inhnek lova a awm hnuah Fury hi kum 2018 khan lo kirin, WBC world heavyweight champion lai Deontay Wilder a rawn cho va, he match hi draw-a puan a ni.

Wilder nen an inhnehtawk hnu hian Fury chuan Tom Schwarz leh Otto Wallin-te a hneh leh a, chumi zawhah awlsam takin Wilder hi a hneha, tunah hian hian Wilder nen a vawi thum nana inhnek turin ruahmanna an kalpui mek.

Wilder hi a hneh leh a nih chuan Fury hi tuna WBA, IBF, WBO leh IBO title te kawl mektu Anthony Joshua nen an inbeih ngei a rinawma, Lennox Lewis hnuah unified heavyweight champion ni leh theih hmasa ber nihna chance a nei dawn.

Kan hria tur erawh Anthony Joshua hian a title kawl lai te hi Kubrat Pulev-a lakah humhim a tum phawt dawna, Fury hian Joshua hi a tum dawn a nih chuan Wilder a paltlang leh phawt a ngai dawn a ni.