Deontay Leshun Wilder-a hi October 22, 1985 khan a lo piang a. Kum 2015 khan WBC heavyweight champion niin; tun thlengin hneh thei an la awmlo. Kum 2008 Olympics-ah bronze medal a hnek chhuak. Olympic a khelh lai atang tawhin a khelh dan maksak tak leh kutthlak nat em avangin a hming a chher hle. Amah Wilder-a hian a hming lemah "The Bronze Bomber" tiin a hming a phuah hial a, boxer ropui Joe Louis-a hming lem " The Brown Bomber" tih atanga a lak a ni nghe nghe.

Boxing khawvelah a kutthlak nat em avangin hriat a hlawh viau a, professional boxing record-ah pawh knockout loh pahnih chiah a nei. Kum 2016 leh 2017 khan "Knockout of the Year" award a dawng nghe nghe bawk.

Amateur career

Wilder-a hian kum 2005 atang khan boxing a luhchilh tan. Skyy Boxing Gym, Albama-ah Jay Deas-a hnuaiah ngawrh takin training a nei hmasa ber a, hetih lai hian kum 20 leka upa a ni.

Kum 2007 a lo inher chhuak. Mipui tam tak beisei loh takin boxer rothap tak tak a hneh chho a. Kg 91 huangah National Golden Gloves leh U.S Champion a ni chho. Olympic khel thei turin boxer Graves a hneh zui leh bawk a, hemi hnu hian Olympic qualifying round-ah Deivis Julio leh Jorge Quinones a hneh bawk a, Olympic khel turin a dinhmun a siam ta chiah a ni. Kum 2008 kum tir lam khan world championship level-ah pawh silver medal lo la tawh a hneh bawk.

Kum 2008 khan Olympics-ah a khel chho a, round hmasa lamah a che tha chho viau a, semi final-ah vanduaithlak takin Clemente Russo a hnehlo thung a, bronze medal erawh a dawng zui ta thung. Amateur record-ah vawi sawmthum a chak a, vawi nga erawh a tlawm thung.

Professional boxing khelh tirh lam

November 15, 2008 khan kum 23 lek niin professional boxing a luhchilh tan a, professional huanga a khelh hmasak ber hian Ethan Cox a hmachhawn a, second round-ah awlsam takin knockout hmangin a hneh. Kum 2012 anih meuh chuan mi sawmhnih panga a hneh tawh a, knockout veka a hneh a ni bawk.

December 15, 2012 khan professional boxing title a lak hmasa ber a ni a, hemi tum hian round hnih naah Kelvin Price knockout hmangin a hneh bawk a ni.

Khawvel hriat a hlawh ta

April 3, 2013 khan Golden Boy Promotions chuan Wilder leh European Heavyweight Champion hlui Audley Harrison inhnek turin ruahmanna a siam a, hemi tuma an inhnek hian round khat naah knockout-in Wilder a chak ta mai bawk a, an inhnek hnu rei vak lovah kum 41 Harrison a chawl zui. Hemi hnu lamah pawh a tumpuite lakah a kutthlak natzia lantirin round rei lote chhungin a hnek tlawm zui mawlh mawlh a ni.

WBC Heavyweight Champion

March 2014 khan first round naah knockout-in Malik Scott a hneh a, WBC Heavyweight Champion chuh thei turin a dinhmun a siam chho. January 17, 2015 khan boxer rothap Stiverne-a nen an inhnek a, unanimous decision-in Wilder chak zawka puan a ni a, WBC Heavyweight Champion a ni zui. Hemi fight-ah Wilder-an 1 million dollar a hnek chhuak a, amah promote tu Golden Boy Promotions nen an inzawmna a tichat a, manager atan AI Haymon a hmang zui.

Title humhim chhunzawm

WBC Heavyweight title a humhim hmasak berna turin Molina a hmachhawn a, round hmasa lamah a hnek thlu mawlh mawlh a, Molina erawh tlawm mai tum lovin a hnek ve leh thin a, round kua naah erawh tihtawp a ni ta thung. August 2015 khan harsa lo takin round sawmpakhat naah TKO-in Duhapas a hneh bawk. Hemi tum hian Wilder-a hian 1.4 million a hnek chhuak a, pay per view atang pawhin a lut tha hle.

Hemi hnu lam hian boxer rothap tak tak Duhapas, Szpilka, Arreola leh Washington-te a hneh a, round khelh tluan pui lova a hneh vek a ni bawk. February 27, 2017 khan Wilder leh Stiverne inhnek leh tura ruahmanna siam a ni a, a hmain decision-in Wilder a lo chak tawh a, an intum nawn leh meuh erawh chuan first round-ah knockout hmangin Wilder a chak thung. Hemi hnu hian Ortiz hmachhawn lehin round 10 naah knockout-in Wilder a chak zui bawk.

Sawisel hlawh Wilder vs Fury

Kum 2018 a inher chhuak a, hnehloh la neilo pahnih Wilder leh Anthony Johnson inhnek tura sawi a awm chho. Inbiakna a kaltuang thei ta si lova, Tyson Fury leh Wilder inhnek tura ruahmanna siam a ni leh ta thung. Staples Center mipui tam tak hmaah Wilder leh Fury an inhnek ta. Hemi tuma an inhnekah hian vawi hnih lai Wilder-an a hnek thlu a, nimahsela round hmasa ber atangin Fury-a kuttum a dawng zing hle a, mipui lam pawhin Tyson Fury chak ngei turin an ngai. Judge thuthlukna puan beiseiin mipui lam an phur hle a, inhnehtawk anga puan a ni ta erawh mipui mak tih a hlawh a, a hmuna en atangin "boo" thawm a ring hle.