Lennox Lewis hi British heavyweight boxer hlui a ni a, a vanglai chuan boxer huhang ngah ber zinga mi niin, boxer piang tawh zinga ngaih ropui ber pakhat a ni bawk.

Lennox hi 6ft 5’-a sang niin, kum 1965 September ni 2 khan West Ham, London-ah a pianga, tunah hian kum 54 mi a ni. Kum 1989 atanga kum 2003 thleng khan boxing khawvelah Lennox hi a chenga, fight 44 nei hmanin, vawi 41 a chaka, vawi 32 lai knock-out hmangin hnehna a chang bawk.

Vawi thum world heavyweight champion ni thei Lennox hian kum 1988 Summer Olympics-ah super-heavyweight division-ah Gold medal a lo la tawha, hemi tum hian final-ah American boxer Riddick Bowe a hneh.

A fight hmasa 21-ah Lennox hian hnehna a chan vek hnuah kum 1992 khan Donovan Ruddock a hneh leha, hetah hian WBC ranking-ah pakhatna a ni. Hemi kum vek hian Lennox hi Riddick Bowe hmachhawn tur ni mahse Bowe hian a hmachhawn duh tak loh avangin Lennox hi WBC heavyweight champion-a puan a ni.

WBC champion a nih hnuah Lennox hian vawi thum a title a humhima, kum 1994 khan Oliver McCall chuan Lennox hi hnehin a title chhuhsak mahse kum 1997 khan Lennox hian McCall hi a hneh leha, hetih hunlai hian WBC title kawltu an awm lova, Lennox hi WBC champion a ni leh.

Lennox hian a hmachhawn tawh zawng zawng te a hneh veka, a hmachhawn tawh te a hneh vek tih hian chak loh a nei lo tihna lovin, a tumpui tawh te a hneh loh pawh a tum nawnnaah a hneh leh vek tihna a ni.

Lennox hian heavyweight boxer ropui tak tak leh rothap tak tak te a hmachhawn tawha, an zingah hneh theih loh tu mah a nei lova, mi tam tak chuan boxing chanchinah heavyweight boxer ropui berah an ngai. Lennox ‘The Lion’ Lewis hi kum 1999 khan Boxing Writers Association fo America chuan Fight of the Year-ah thlangin, BBC Sports Personality of the Year-ah thlan a ni bawk.

Kum 1999 khan Lennox leh Evander Holyfield te chu vawi hnih an inhmachhawna, a hmasa zawk hi draw-a puan niin, a hnuhnung zawkah Lennox hian hnehna a changa, hetih hunlai hian Lennox hi WBC champion niin, Holyfield-a WBA leh IBF world heavyweight title kawl lai te a chhuhsak bakah kawltu awmlo IBO world heavyweight champion ni zui bawkin undisputed heavyweight champion a ni a, hemi hnu hian heavyweight division-ah undisputed champion an la awm leh lo.

Kum 2000 khan Lennox hian WBA mandatory challenger John Ruiz aiah Michael Grant a hmachhawn zawk avangin WBA chuan a WBA title kawl lai hi an chhuhsaka, kum 2002 khan IBF mandatory challenger Chris Byrd a hmachhawn duh loh leh avangin IBF chuan a IBF title kawl lai hi an chhuhsak leh.

Kum 2001 khan Lennox hi beisei loh takin Hasim Rahman chuan a hneha, mahse hemi kum vek hian Lennox chuan Rahman hi a hneh leh nghal. Kum 2002 khan Lennox hian Mike Tyson chu round 8-naah a KO-a, he fight hi heavyweight boxing chanchina huhang ngah ber leh a hunlaia boruak nei sang bera ngaih a ni. 

Mike Tyson nena an inhnek hma lawk hian Ring Magazine chuan an heavyweight title chu Lennox-a hnenah an hlana, Ring Magazine hian 1980 chho khan an title hi an kalpui tawh loh hnuah Lennox hi an hlan leh.

Kum 2003 khan Lennox chuan heavyweight boxer ropui Vitali Klitschko chu inhnek hmuhnawm takah a hneha, round 6-naah Lennox hian Klitschko hi KO hmangin a hneh. He fight hi Lennox-a fight hnuhnung ber a ni a, hemi kum hian a title kawl lai (WBC, IBO, The Ring leh lineal heavyweight title)-te dah awlin boxing a chawlhsan ta a ni.