13 Jul 2019 09:18

inkhel

Bottas-a’n British GP pole position a chang

Formula One British Grand Prix qualifying-ah Mercedes driver Valtteri Bottas chu a che tha ber a, a teammate Lewis Hamilton aiin 0.006 second in a tlan chak hret a, pole position a chang.

Lewis Hamilton chuan British Grand Prix bikah vawi 6 chak theih a tum hle a, record thar siam a tumna kawngah hian a teammate chu a hnawk thei dawn niin a lang a. Bottas chuan Hamilton hi chaktir a tum bik hauhin a rinawm lo a, pole position a chan bawk avangin pakhatna nih ngei a tum viau tura ngaih a ni.

2014 hnuah Hamilton hian anmahni ramah hian pole position a la chang chho ziah a, tun tum hi a ding hma ber tur a nih loh hmasak ber tum a ni a. Bottas hian tun season-ah bul a tan tha viau a, intlansiak hmasa pahnihah a chak a, mahse May thlaa Spanish Grand Prix hnuah khan pole position hi a chang leh thei ta lo.

Championship standing lamah chuan vawi nga ngawt world champion lo ni tawh Hamilton chu a la sang ber a, vawi kua intlansiak tawhah amah hnaih bertu Bottas ai hian point 31 in a sang tawh zawk a ni.

Pathiannia intlansiak dawnah Mercedes driver pahnihte chu a hmaah an ding ang a, Ferrari driver Charles Leclerc chu pathumnaah a awm dawn a, a hnungah hian Red Bull driver Max Verstappen a awm ang.

Red Bull driver pakhat zawk Pierre Gasly chu panganaah a ding ang a, Ferrari driver pakhat zawk Sebastian Vettel chu paruknaah a ding dawn a. Pasarihnaah chuan Renault driver Daniel Ricciardo a ding ang a, a hnungah hian McLaren driver Lando Norris a ding dawn bawk a ni.

Qualifying result

1. Valtteri Bottas (Fin) Mercedes GP 01min 25.093secs
2. Lewis Hamilton (Gbr) Mercedes GP 01:25.099
3. Charles Leclerc (Mon) Ferrari 01:25.172
4. Max Verstappen (Ned) Red Bull 01:25.276
5. Pierre Gasly (Fra) Red Bull 01:25.590
6. Sebastian Vettel (Ger) Ferrari 01:25.787
7. Daniel Ricciardo (Aus) Renault 01:26.182
8. Lando Norris (Gbr) McLaren 01:26.224
9. Alexander Albon (Tha) Scuderia Toro Rosso 01:26.345
10. Nico Hulkenberg (Ger) Renault 01:26.386
11. Antonio Giovinazzi (Ita) Alfa Romeo Racing 01:26.519
12. Kimi Raikkonen (Fin) Alfa Romeo Racing 01:26.546
13. Carlos Sainz (Spa) McLaren 01:26.578
14. Romain Grosjean (Fra) Haas F1 01:26.757
15. Sergio Perez (Mex) Racing Point 01:26.928
16. Kevin Magnussen (Den) Haas F1 01:26.662
17. Daniil Kvyat (Rus) Scuderia Toro Rosso 01:26.721
18. Lance Stroll (Can) Racing Point 01:26.762
19. George Russell (Gbr) Williams 01:27.789
20. Robert Kubica (Pol) Williams 01:28.257