28 Sep 2020 05:55

inkhel

Borussia Dortmund fitness trainer Alica Schmidt

Alica Schmidt chuan tun hnaiah thawm a nei lian hle a, Borussia Dortmund chuan fitness trainer atan an ruai mek a, a chanchin thenkhat tar lang ila a tha awm e.

German athlete leh model hmel tha leh pian nalh Alica Schmidt hi Australian magazine Busted Coverage pawhin a hmain khawvela infiammi sexy berah an lo thlang tawh a. ‘World’s Sexiest Athlete’ tia an thlang hi tu vak mahin an sawisel lo a nih hmel hle.

Kum 21-a upa Alica Schmidt hi Borussia Dortmund nen an inthlunzawm hnuah phei chuan miin an ngaihven nasat zual phah hle a. Instagram lamah pawh follower a neih belh nasa a, amah follow tu hi 1 million an tling ve dawn tawh a ni.

Infiamna huangah Alica Schmidt hi a theuneu lem lo hle a, 400 metres intlansiakah a tel thin a, 2017 kumah khan 20 European Athletics Championships an neihah pawh silver medal a lo la tawh a, hetih lai hian kum 18-a upa a la ni.

Kumina neih tura ruahman, coronavirus vanga kum thar lama neih tura an sawn hlat, 2020 Tokyo Olympics-ah pawh Alica Schmidt hi tel turin a tling tawh a, Japan ramah chuan medal lak theih ngei a tum hle a. Nikumah khan U23 European Championship-ah bronze medal a la bawk a ni.

Dortmund ang bawkin Schmidt hi German sports company lar Puma chuan an sponsor a. Instagram lamah pawh Puma thil siam chi hrang hrang hi a lo vawrh lar ve tawh thin a, social media hi mi thil siam fakna atan a hmang tangkai hle.