Boris Becker chu sum lama a tlakchhiat avangin trophy leh thil dang a lo dawn tawhte chu an lilam a, £680,000 vel zet chu an lei tling.

German tennis legend Boris Becker chu 2017 khan British court chuan bankrupt tiin an puang a, private banker Arbuthnot Latham & Co. pawisa a bat hnem em avanga hetianga puang hi an ni a. A sum dinhmun tlachhia buaipuitu company chuan a thil neih hlu chu an lilam ta a ni.

Internet kaltlangin Boris Becker-a bungrua hi an lilam a, a pumpuiah £680,000 vel zet chu an hmu thei a. An thil lilam zingah hian 1989 US Open trophy chu an hralh to ber niin, he trophy hi £150,250 zetin an hralh a ni.

Becker-a bungrua an hralh zingah hian 1989 US Open trophy bakah thil dang chi hrang hrang 80 chuang a tel a. Heng zingah hian Davis Cup winners trophy lem pawh telin, hei hi £52,100 in an hralh a. Sana bun chi leh inkhelhnaa hak chi thawmhnaw te pawh a tel bawk.

Nikumah khan Becker-a bungrua hi lilam tura tih a ni tawh a, mahse amah ber hian Central African Republic ah nihna a chelh a, sports envoy anga a awm avangin a hun hi an sawn leh a ni.

2018 ah khan US Open trophy ngam huai berin £36,000 in an chhang a, kuminah erawh an ngamna hi a sang tawh hle a, £150,250 zet a ni tawh niin Smith and Williamson a thawk, Mark Ford chuan a sawi a. Smith and Williamson hi Boris Becker-a sum dinhmun tlachhia buaipuitute an ni.

Mark Ford chuan Becker-a Grand Slam trophy bo pawh an hmuh leh theih a beisei thu sawiin, trophy bo zingah hian Wimbledon trophy leh Australian Open trophy te chu a tel a ni.

Boris Becker chuan nikum lamah khan a trophy bo chu a chin hria chuan pe let leh hram turin ngenna a siam a. A vanglai khan Grand Slam singles title 6 a la a, hengah hian Wimbledon title 3 a tel a. 1992 Barcelona Olympics-ah doubles gold medal a la bawk a ni.