Top seed Rohan Bopanna leh Divij Sharan te chuan Asian Games neih mekah an khingpuite chu an hneh chiang hle a, gold medal an la.

Rohan Bopanna leh Divij Sharan te chuan tennis mipa doubles final-ah Kazakhstan pair Aleksander Bublik leh Denis Yevseyev te an hmachhawn a, inkhelh tan atanga minute 20 chhung lekin Indian pair te hian 4-1 in hma an hruai hman a. An khel chho zel a, Bopanna te hian 5-3 in hma an hruai a, a tawpah set khatna chu 6-3 in an la a.

Kazakhs pair te hi an tlan thei zawk a, an che pawh a rang a, mahse Indian pair te tawn hriat ngahna a lang a, an chungnung zawk hle a ni.

Set hnihna an khel chho leh a, an inhnehtawk chho viau a, 3-3 te a ni a. Bopanna leh Sharan te hian an break leh thei ta hlauh a, hemi zarah hian 5-3 in hma pawh an hruai chho thei ta a.

Aleksander leh Denis te hian theihtawp an han chhuah ve a, mahse an beisei ang chuan thil a thleng ta lem lo a. Indian pair Bopanna leh Sharan te hian set hnihna hi 6-4 in an la leh ta a. Bopanna leh Sharan te hi minute 52 chhungin 6-3, 6-4 in an chak a, Asian Games gold medal chu a vawi khatna atan an la a ni.

Asian Games bikah hian men’s doubles gold medal hi a hmain an lo la ve tawh hlawm a. India mipa doubles pair hlawhtling ber Mahesh Bhupathi leh Leander Paes te chuan 2002 leh 2006 khan gold medal hi an lo la tawh a, 2010 khan Guangzhou-ah Somdev Devvarman leh Sanam Singh te chuan an la ve leh bawk.

2014 khan Saketh Myneni leh Sanam te chuan silver medal an lo la tawh bawk a ni.