Usain Bolt chuan professional football contract ziah dan a ngaihtuah mek a, Australian club Central Coast Mariners hnenah trial a nei mek a, Malta club Valletta chuan kum hnih chhung atan contract an zawrh a, mahse Bolt hian a hnar.

Jamaican sprinter Usain Bolt hian A-League club Mariners bulah trial a neih chhunzawm zel a, a game khelh hmasak berah Zirtawpni khan goal hnih a thun nghal a. Hei hnu hian Malta club pakhat Valletta FC chuan Bolt hi kum hnih chhung contract ziahpui tumin an bia a, mahse Bolt hian Australia rama la awm chhunzawm rih a thlang ta a ni.

Bolt-a agent Ricky Simms chuan Maltese club hi zawm rih loh a thlan thu a sawi a, club hrang hrangin Bolt chu an ngaihven ve nual nia sawiin, thutlukna siam mai a la tum lo niin a sawi bawk.

Ricky Simms chuan, “Usain Bolt football khel chu ngaihventu an awm ve nual mai a, rawn thlithlaitu leh rawn be thawi deuh hi chu an awm tan a. Usain hian Malta lam pan hi chu a duh chiah lo deuh tih chu ka sawi chiang thei,” tiin a sawi.

Valletta chief executive Ghasston Slimen chuan, “Valletta FC in kan hnena khel turin Usain Bolt kan sawm a, kan sawmna a hnar rih a. Eng tikah pawh Bolt tan chuan kawng kan hawng a. Football a khelh chhohna turah duhsakna kan hlan a ni,” a ti.

Australia rama league sang A-League chu tun kar tawpah hian an tan tawh dawn a, Mariners hian Pathianniah Brisbane Roar an hmachhawn dawn a. Usain Bolt chuan contract a la neih loh avangin a khel ve thei dawn lo a, Mariners chief executive Shaun Mielekamp chuan Bolt chu an hnenah tiam chin awm loa trial zel tur a nih thu a sawi.

Mariners hian Football Federation Australia an ngaichang mek a, 100m world record holder Usain Bolt lakluhna turin Aus$3 million (US$2.1 million) an tumsak ve theih dawn leh dawn loh an ngaichang niin an sawi a ni.