Bombay Convention & Exhibition Centre-a BodyPower National MMA Championship 2016 neih mekah Mizoram atanga fehchhuakte an che tha hle a, gold pahnih leh bronze pakhat Mizo fighter-ten vawiin khan an hlawhchhuak.
BodyPower national MMA championahip 2016 hi AIMMAA hnuaia India ramc hhunga MMA event lian ber a ni a. Mizo team-te JSJ FitPro Fight team an ni a, Samuel Lalrozama Hmar kaihhruai niin, MISMA leh Mizoram police-te aiawhin he event-ah hian an tel a ni.
Vawiinah kum 18 hnuai lamah hlawhtlinna Mizoram hian an chang a. Dominic Savio, Kulikawn chuan a zâwna khel char charin Semi-Contact MMA-ah gold medal a la a. Lalchhuanawma, Luangmual pawhin Semi contact ah bronze leh Light contact ah gold a la a ni. Naktukah amateur MMA heng mite hian an khel leh ang:
Lalbiaksanga, Tuikual - MMA
Ngurlianzuala, Lily Veng - MMA
Zothansanga, Electric Veng - MMA
Ngura tih loh hi Instructor Manova'n Mizorama a lo chherte an ni. He event-ah hian pro bout 4 a awm dawn a, chung zingah chuan fight of the night chu Samuel Lalrozama Hmar student te pahnihin an khel dawn hlauh mai a, a lawmawm leh dangdai hle. Xico Zorinmawia'n Jan ni 10 hian Bangalore lam mi Biswa Dev a fight dawn a ni.
Samuel Lalrozama Hmar hi he event-ah hian head referee a ni a, ani hi Mizoram chhunga MMA tana hma la hmasa ber pakhat a ni. He event-ah hian mi 200 chuang state 15 leh ram hrang 7 ațangin an tel a ni.
Samuel-a chuan,"Ka naute ka chhuang hle a, an khingpui turte zingah hian ka hnuaia lo zir tawhte pawh an awm nawk mai. Tin, Mizoram atanga fehchhuakte hi JSJFitPro Gym, Khatla sponsor an ni a, an chungah kan lawm tak zet a ni," tiin inkhel.com a hrilh.
He event hi India rama fitness expo lian ber a ni a, ni khat luh man ₹1200 a ni a, cheng zanga chauhin Mizo entum an awm chuan Mizoram Team hian lo buaipui an inhuam hle a, Mizote chhim ve turin an sawm nghal bawk a ni.