​Boca Juniors-ah Tevez kir leh ta

27th June 2015, 04:06PM

Kum 31 mi Argentine striker Carlos Tevez chu a chawr chhuahna Boca Juniors-ah a kir leh ta a, Liverpool, Atletico Madrid leh PSG ten rim mahse Juventus striker hian an ram lama kir leh a thlang ta zawk a ni.

2004 khan Boca Juniors chhuahsanin Corinthians a pan hnuah Europe-a eizawng turin Tevez hi a fehchhuak a, West Ham, Manchester United, Manchester City leh Juventus-ah te khel kualin, season liamta khan Juventus tan goal 20 khungin Serie A a champion pui bakah coppa italia-ah pawh a champion pui a ni.

Juventus hian Tevez a chhuak dawn tih an hriat chian tawh avangin a thlak nan Mario Mandzukic chu Atletico Madrid atangin an lei tawh a. Tukina Copa America match-a Argentina leh Colombia te an inkhelh lai khan Boca Juniors chuan Tevez an lei fel ta tih an confirmed.

Hetih lai hian Tevez chu bench-a a thu a, second half-ah lutin, Boca Juniors player niin Argentina chu penalty-ah 5-4 in hnehna a chanpui ta a ni. Argentina hian semi final lutin, semi final-ah Paraguay emaw Brazil emaw chak zawk zawk an tum dawn a ni.

Boca president Daniel Angelici chuan,"Hlimna ni a ni a, kan duhdan angin thil a kal e. Hnuhma ropui tak a hnutchhiah hnuah a lo kir leh dawn a, Boca Juniors tan tute leh Argentina football tan chuan thu thar ngaihnawm tak a ni e. Carlos lo kir leh hian kan team chu nasa takin a tichak dawn a ni," tiin a sawi.

Tevez hian Europe-a a fehchhuah chhungin English title pathum leh Serie A title pahnih a la a, 2007-08 khan Champions League-ah Manchester United a champion pui bawk a. Boca Juniors tan game 110 atangin goal 38 lai a khung a, South American player of the year atan a zawnin vawi thum ngawt an thlang a. 2005-06 season khan Corinthians zawmin, heta tang hian Europe-ah chuang chhuakin, West Ham a zawm ta a ni.

Copyright © inkhel.com 2024. All rights reserved.